Pas vdekjes së Papa Françeskut, kardinalët katolikë kanë caktuar datën e nisjes së konklavës për zgjedhjen e Papës së ri. Raportohet se kardinalët katolikë kanë caktuar datë 7 maj për nisjen e konklavës për zgjedhjen e Papës së ri. Mbledhja e kardinalëve u zhvillua këtë të hënë për të diskutuat hyrjen në konklavën sekrete dhe për të zgjedhur liderin e ri të Kishës. Kapela Sistine, që daton nga shekulli i 16-të, ku mbahen konklavat, u mbyll për turistët të hënën për t’u mundësuar përgatitjet për votimin.
Papa i ri duhet të zgjidhet nga zyrtarët më të lartë të Kishës Katolike, të njohur si Kolegji i Kardinalëve. Aktualisht janë 252 kardinalë katolikë, 135 prej të cilëve kanë të drejtë të votojnë për Papën e ri.
Të tjerët janë mbi 80 vjeç, që do të thotë se nuk mund të marrin pjesë në zgjedhje, edhe pse mund të bashkohen në debatin se kush duhet të zgjidhet.
Kardinalët do të qëndrojnë në një shtëpi mysafirësh brenda mureve të Vatikanit të njohur si Shtëpia e Shën Martës, ku do të kenë shërbimet e kuzhinierëve dhe pastruesve të shtëpisë plus dy mjekëve, njëri prej të cilëve është kirurg.
