Kuvendi pritet që të hënën të votojë për plotësimin e dy vakancave në Gjykatën Kushtetuese. Pak ditë më parë Presidenti Meta u tërhoq nga zgjedhja e tij pasi sipas tij është rradha e Parlamentit për të zgjedhur anëtarin e radhës sipas Kushtetutës.
Lidhur më këtë vendim të Presidentit Meta ka reaguar edhe zëdhënësi i tij Tedi Blushi. Duke iu referuar nenit 179 pika 2 dhe 12 të Kushtetutës ai shkruan se Presidenti ka respektuar radhën e institucioneve në zgjedhjen e anëtarëve të Gjykatës Kushtetuese dhe se tani pret që të shprehet Kuvendi.
“Ndërkohë që anëtari i parë i saj i kësaj Gjykate është emëruar nga Presidenti që në datën 15 tetor dhe aktualisht është në detyrë.
Nuk ekziston asnjë individ apo institucion sipas Kushtetutës e ligjit, që t’i imponojë Presidentit të Republikës të shkelë Kushtetutën, që në këtë rast është shumë e qartë.
Në nenin 179 pika 2 dhe 12, Kushtetuta përcakton se:
“2. Anëtari i parë për t’u zëvendësuar në Gjykatën Kushtetuese emërohet nga Presidenti i Republikës, i dyti zgjidhet nga Kuvendi dhe i treti emërohet nga Gjykata e Lartë. Kjo radhë ndiqet për të gjitha emërimet që do të bëhen pas hyrjes në fuqi të këtij ligji.”
“12…. Me krijimin e Këshillit të Lartë Gjyqësor, Presidenti emëron gjyqtarët e Gjykatës së Lartë, sipas nenit 136 të Kushtetutës. Presidenti plotëson vakancën e parë në Gjykatën Kushtetuese sipas paragrafit 2, të këtij neni, dhe nenit 125 të Kushtetutës.”.” shkruhet në njoftimin e Presidencës.
Zëdhënësi i presidentit thekson se veprimtaria e këtij institucioni ka treguar se ka qenë gjithmonë garant i zbatimit të Kushtetutës dhe “cilido që ushqen iluzione se duke provokuar dhe duke bllokuar me tej ngritjen e Gjykatës Kushtetuese do arrijë përfitime afatshkurtra politike, do të zhgënjehet shumë rëndë.” /Opinion.al
