Rreth 3 vjet më parë, kur Borës iu besuan emisionet më të ndjekura të sportit në Digitalb, por edhe një pjesë e mirë e terrenit, ra në sy të gjithëve një personazh jo i panjohur, por me stil të ri në prezantim, që, veç bukurisë fizike, ishte edhe një vajzë me ambicie. Me punën dhe përkushtimin maksimal, Bora ia doli që të listohet ndër prezantueset më të preferuara të publikut dhe, sa i përket sportit, aty ku ishte Fun Zone, ishte gjithmonë Bora.
Kjo kënaqësi vijoi gjatë me eksperiencën disavjeçare në Digitalb dhe në rubrikat sportive që drejtonte Bora nga studio dhe nga terreni. “Bar skedina” ishte një prej stacioneve që Bora e drejtoi për disa sezone.
Por tashmë, largimi i saj është zyrtar. Në “Top Arena”, ku ishte e ftuar gjatë muajit të Botërorit, Bora la të nënkuptohej se sezoni i ri nuk do ta gjente më në Digitalb, ndërsa në “Pushime on top”, pak javë më parë, konfirmoi se sezonin e ri do të jetë diku tjetër.
Po kush është vajza që këtë sezon të ri do të zëvendësojë Borën në “Bar Skedina”? Programi sportiv në Digital i është besuar Gea Brahës, ish-velina e Fiks Fare, e cila këtë të diel ka konfirmuar, përmes një fotoje nga “bari” i Digitalb se do të jetë ajo që do të menaxhojë “luftën” sportive prej këndej.
Gea ka përfunduar studimet për Financë-Bankë, është e apasionuar pas televizionit, ndaj edhe ka pasur gjithmonë dëshirë të ketë një emision të sajin: “Nuk më pëlqen të kthehem aty ku e kam nisur, tek kërcimi. Do të më pëlqente shumë të kisha një emision timin. Pse jo edhe një emision sportiv apo një emision që merret me showbiz? Nuk do të preferoja një emision politik, pasi nuk më tërheq aspak politika. Nëse më bëhet një ofertë për në fushën e modelingut, do të pranoja me kënaqësi. Unë si modele e kam nisur karrierën time dhe vijoj të jem e apasionuar pas modës”, – tha Gea pak kohë më parë për Pop Culture.
