Zëri i Amerikës ka reaguar lidhur me deklaratën e kryeministrit Rama në Twitter, që tha se VOA flet nga kazani i Tiranës.
Elez Biberaj, drejtori për Evropën dhe Euroazinë i Zërit të Amerikës tha se kjo media arrin të sigurojë për audiencën lajme dhe informacione të sakta e të paanshme. Ai ka garantuar integritetin dhe gjykimin e lajmit.
I pyetur nga Ora News, gazetari Biberaj u shpreh si më poshtë:
“Shërbimi shqiptar i Zërit të Amerikës ka siguruar vazhdimisht raportime të sakta dhe të paanshme rreth zhvillimeve në Shqipëri dhe unë garantoj plotësisht integritetin dhe gjykimin e lajmit. Shërbimi shqiptar vijon me krenari misionin e prodhimit të gazetarisë së vlerave në mbështetje të demokracisë dhe lirisë dhe t’i sigurojë audiencës së tij lajme dhe informacione të sakta, objektive dhe të balancuara në mënyrë që ata të bëjnë zgjedhjet e duhura”.
Kujtojmë se deklarata e Ramës erdhi pas publikimit nga VOA të disa përgjimeve lidhur me punësimet në administratë dhe konkurset fiktive.
Më poshtë postimi i Ramës”
“Erdhi dita që Zëri i Amerikes të flasë nga kazani i Tiranës, duke përgojuar dynjanë mbi bazë llogjesh telefonike. Për herë të parë në Albania organizohet konkurs publik për punësimet në burgje dhe kazani gjëmon deri në Amerikë e jehon në katundin tonë mediatik. Çfarë katandie”
