Presidenti i Ukrainës, Volodymyr Zelensky iu drejtua Këshillit të Sigurimit të OKB-së virtualisht këtë të mërkurë, duke kërkuar që mbikëqyrësi bërthamor i organizatës, Agjencia Ndërkombëtare e Energjisë Atomike (IAEA), të marrë kontrollin e përhershëm të situatës në uzinën e Zaporizhzhia sa më shpejt të jetë e mundur. Ai gjithashtu i bëri thirrje Rusisë që të tërhiqet plotësisht nga uzina.
“Rusia e ka vënë botën në prag të katastrofës së rrezatimit. Është fakt që ushtria ruse e ka kthyer territorin e termocentralit më të madh bërthamor në Evropë, termocentralit bërthamor Zaporizhzhia, në një zonë lufte… Tani Evropa dhe rajonet fqinje përballen me kërcënimin e ndotjes nga rrezatimi”, tha Zelensky.
Sekretari i Përgjithshëm i OKB-së, Antonio Guterres tha gjithashtu se është shumë i shqetësuar nga situata në Zaporizhzhia. “Dritat paralajmëruese po ndizen. Çdo veprim që mund të rrezikojë integritetin fizik ose sigurinë e centralit bërthamor është thjesht i papranueshëm. Çdo përshkallëzim i mëtejshëm i situatës mund të çojë në vetëshkatërrim,” tha Guterres ndërsa fliste në Këshillin e Sigurimit të OKB-së.
Sekretariati i OKB-së është në kontakt të ngushtë me IAEA për të mbështetur çdo mision në termocentralin nga Kievi, me kusht që Rusia dhe Ukraina të bien dakord./Opinion.al
