Rusia duhet të përballet “vetëm me ndëshkim” për shkak të pushtimit të saj në Ukrainë, ka thënë presidenti Volodymyr Zelensky në Asamblenë e Përgjithshme të OKB-së në Nju Jork.
Në një video të regjistruar paraprakisht, udhëheqësi ukrainas bëri thirrje për krijimin e një tribunali të posaçëm lufte dhe ka përmendur krimet e supozuara të luftës të kryera nga Rusia.
Ai ka prezantuar gjithashtu një “formulë” paqeje, që përfshin më shumë mbështetje ushtarake dhe ndëshkim të Rusisë në skenën botërore.
Fjalimi i tij është përcjellë me duartrokitje nga shumë prej të pranishmëve në takim.
Në fjalën e tij hyrëse, Zelensky akuzoi Rusinë se ka shkaktuar “turbulenca katastrofike” përmes “luftës së saj të paligjshme”.
Ai foli në të njëjtën ditë që presidenti rus Vladimir Putin thirri 300,000 rezervistë ushtarakë në detyrë, një vendim që shkaktoi protesta në rrugët e Rusisë.
Zelensky tha se ky vendim tregoi se armiku i tij nuk ishte serioz rreth bisedimeve për paqen.
Ai i ka dënuar planet e bëra publike së fundi nga pala ruse që të mbahen të ashtuquajturat referendume në disa qytete ukrainase që ka pushtuar Rusia, prej nisjes së luftës.
Ai foli gjithashtu për zbulimin e 445 varreve të reja në Izyum, një qytet verilindor i rimarrë së fundmi nga forcat ruse gjatë një kundërofensive gjithëpërfshirëse të Ukrainës.
Zelensky ka përmendur dhe detaje të tjera të krimeve të supozuara të luftës në këtë qytet, duke thënë se një burrit i janë hequr të gjitha organet mashkullore dhe më pas është vrarë.
“Pse ushtria ruse është kaq e obsesionuar me heqjen e këtyre organeve?”, ka pyetur ai.
Fjala “ndëshkim” është përmendur 15 herë në fjalimin e Zelenskyt, dhe ka qenë një prej pesë kushteve të panegociueshme për arritje të paqes.
Rusia duhet të përballet me pasoja për agresionin e saj, ka thënë ai, duke përmendur sanksione shtesë dhe që OKB-ja t’ia pezullojë Rusisë rolin e anëtares së përhershme në Këshillin e Sigurimit.
Ai po ashtu ka bërë thirrje që të mbrohen jetët ukrainase, dhe që të respektohen kufijtë ndërkombëtarë të shtetit.
Si kushtin e katërt dhe pestë, ai ka kërkuar garanci të reja të sigurisë për Kievin, dhe që bota që bashkohet për të dënuar agresionin e armatosur të Moskës.
Më 21 shtator, kryediplomati i Bashkimit Evropian, Josep Borrell, ka thënë se shtetet e BE-së janë pajtuar të godasin Rusinë me sanksione të reja.
Borrell u ka thënë gazetarëve se kufizimet e reja do të shënjestrojnë individët rusë dhe sektorët ekonomikë shtetërorë.
I paraqitur me bluzën e gjelbër në video, Zelensky ka falënderuar 101 shtetet që kanë votuar në OKB, që prezantimi i tij të jetë përmes videos, në vend të prezencës fizike.
Ai ka kritikuar shtatë shtete, përfshirë Rusinë, që kanë votuar kundër paraqitjes së tij, ashtu sikurse vendet që janë duke mbajtur qëndrim neutral për konfliktin.
Pavarësisht sugjerimit të Zelenskyt se Rusia nuk është serioze për negociata, dy shtetet kanë kryer një këmbim të madh të të burgosurve të luftës më 21 shtator.
Ukrainës i janë kthyer 215 luftëtarë, përfshirë 10 të huaj, derisa Rusia ka pranuar 55 ushtarë dhe politikanin pro-rus, Viktor Medvechuk, i cili është përballur me akuza për tradhti në Ukrainë./Opinion.al
