Presidenti i Ukrainës Volodymyr Zelensky tha se sulmi i vazhdueshëm rus në qytetin e Mariupolit është një “akt terrori” që do të “mbahet mend për shekuj”.
Në një video-mesazh të postuar në Facebook, presidenti ukrainas tha se Mariupol do të mbetet në histori si një shembull i krimeve të luftës.
Më herët të shtunën, Zelensky iu drejtua popullit zviceran përmes lidhjes video, duke thënë se Zvicra mbështet sanksionet e BE-së kundër Moskës dhe i bëri thirrje Zvicrës që të ndërmarrë veprime të mëtejshme kundër Rusisë.
“Kjo do të thotë shumë për aparatin shtetëror rus, për njerëzit që janë mësuar të mendojnë se pushteti është para”, tha ai në mesazhin në Facebook.
Ai tha se i kërkoi Zvicrës që të ndërmarrë hapa shtesë, si për shembull, të sigurojë që kompanitë zvicerane që nuk janë larguar ende nga tregu rus do ta bëjnë këtë menjëherë.
“Që të mos i japin asnjë dollar, franga apo euro makinës ruse të luftës për vrasjen e njerëzve tanë. Që të gjithë ata që janë fajtorë të luftës kundër vendit tonë, të mos mund ta shijojnë jetën në Zvicër, pasuritë e paluajtshme zvicerane dhe bankat zvicerane”./Opinion.al
