Gjatë një interviste me CNNi dhe gazetaren Christian Amanpour në Konferencën e Sigurisë në Mynih, presidenti ukrainas Volodymyr Zelensky e përshkroi situatën në kufi si kritike dhe kërkoi që lista e sanksioneve kundër Rusisë të bëhet publike menjëherë.
“Ne nuk kemi nevojë për sanksionet tuaja pasi ka ndodhur një bombardim dhe pasi është qëlluar, apo pasi të mos kemi më kufij dhe ekonomi. Pse duhet të na duhen sanksionet atëherë?” tha Zelensky, duke shtuar se “nëse nuk mund të bëni publike çfarë do t’i ndodhë kujt nëse shpërthen një luftë, ( ndonëse dyshoj se do të ketë sanksione) pasi kjo të ndodhë.”
Presidenti i Ukrainës flet hapur teksa rusët grumbullohen në kufi
Duke iu përgjigjur pyetjeve të Christian Amanpour, Zelensky tha se ishte i gatshëm të takohej me Vladimir Putin dhe të merrte pjesë në bisedime “në çdo formë”. “Nuk e di se çfarë dëshiron. Prandaj sugjeroj të takohemi,” tha ai kur u pyet nëse ishte në dijeni të qëllimeve të Vladimir Putin.
Sa i përket qëndrimit të mbështetësve perëndimorë të Ukrainës, ai u shfaq i mërzitur duke thënë se: “Vazhdojnë të na thonë se dyert janë të hapura, por nuk na thonë nëse ka shtete anëtare që nuk na duan”. “Përderisa ka ‘heshtje’ për këtë, ‘nuk do të ketë qetësi në Evropën Lindore’, paralajmëroi ai.
I pyetur për akuzat për një sulm të ushtrisë ukrainase në Rostov-on-Don, ai tha se ishte një “gënjeshtër” dhe shtoi se “ushtria ukrainase është më ‘e rritur’ se të tjerët” dhe nuk iu përgjigjet provokimeve, duke e ditur se rreziku i luftës është i madh.
Vetë Zelenksy tha pak para se të merrte pjesë në Konferencën e Sigurisë në Mynih se vendi i tij nuk do t’i përgjigjet provokimeve të separatistëve pro-rusë në Ukrainën lindore dhe do të luftonte për të vendosur paqen përmes diplomacisë.
Zelensky stigmatizoi qëndrimin e Perëndimit në tetë vitet e konfliktit të Donbasit, duke folur për një politikë qetësimi ndaj Rusisë që duhet të ndalet, dhe në të njëjtën kohë theksoi se nuk mund të arrihet asnjë marrëveshje me Rusinë që nuk përfshin vendin e tij.
“Është e rëndësishme që të gjithë partnerët dhe miqtë të mos bien dakord për asgjë pas shpine,” tha Zelenksy, duke shtuar: “Ne nuk jemi në panik. Jemi shumë të qëndrueshëm në mospërgjigjjen ndaj sfidave.”
Ai theksoi gjithashtu se e vetmja gjë që bëjnë deklaratat e përditshme të pushtimit të afërt është shkatërrimi i ekonomisë ukrainase.
“Ne do ta mbrojmë vendin tonë, me ose pa mbështetjen e partnerëve”, tha Volodymyr Zelensky, duke i bërë thirrje si Bashkimit Evropian dhe NATO-s të “jenë të sinqertë” në lidhje me synimet e tyre për anëtarësim të mundshëm.
Nga podiumi i Konferencës së Sigurisë në Mynih, presidenti ukrainas e përshkroi sistemin e sigurisë në Evropë si “të vjetëruar” dhe foli për nevojën “për të ndërtuar një sistem të ri përpara se të gjejmë veten përsëri me miliona të vdekur”.
“Nuk ka më ‘kjo luftë nuk është e imja’ dhe kërcënimi nuk ka të bëjë me Ukrainën, por me Evropën,” tha ai./Opinion.al
