Presidenti ukrainas, Vladimir Zelensky, ka thënë se Ukraina është e gatshme, të nisë kundërofensivën e shumëpritur, për t’i çliruar territoret e pushtuara nga forcat ruse. Por, ai ka paralajmëruar se kundërofensiva do të jetë e kushtueshme.
“Ne besojmë fuqishëm se do të dalim fitimtarë”, ka thënë Zelensky në një intervistë të publikuar në të përditshmen amerikane, Wall Street Journal, më 3 qershor.
“Nuk e di sa do të zgjasë. Për të qenë i sinqertë, mund të ndodhin shumë gjëra, do të shkojnë në disa drejtime. Mirëpo ne do ta nisim, dhe jemi të gatshëm”, ka thënë ai.
Ai është shprehur se Ukrainës i duhen më shumë armë, përfshirë pajisjet e armatosura, përpara se të nisë kundërofensiva e shumëpritur.
Presidenti ukrainas ka muaj që i kërkon Perëndimit, më shumë ndihmë ushtarake dhe armë. Rusia tani zotëron territor ukrainas në lindje, jug dhe juglindje të shtetit.
Ndër të tjera Zelensky ka thënë se Ukraina ka nevojë urgjente për më shumë sisteme raketore të mbrojtjes, Patriot, të prodhuara nga Shtetet e Bashkuara, për t’i mbrojtur qytetarët e saj nga sulmet ajrore ruse. Sistemet Patriot përdoren për të rrëzuar raketat hipersonike ruse.
Kundërofensiva është vonuar për shkak të motit të lagësht që e bën tokën të papërshtatshme për automjete të rënda dhe të blinduara, por një periudhë e thatë në disa pjesë të Ukrainës ka nxitur pritjen se operacioni mund të jetë i afërt./Opinion.al
