Zëdhënësi i BE-së për çështje të jashtme dhe të sigurisë, Peter Stano, tha se për dhunën e ushtruar në veri të Kosovës janë përgjegjëse të dyja palët, duke iu referuar Kosovës dhe Serbisë.
Gjatë një konference për media, Stano në deklaratën e tij ka dënuar dhunën në veri të Kosovës.
“Eskalimin e shohim që nga e premtja, prandaj edhe shefi i politikës së jashtme të BE-së, Joseph Borrell dhe vendet anëtare të BE-së e kanë dënuar dhunën dhe kanë ftuar për uljen e tensioneve. U kanë thënë të dyja palëve”, tha Stano për gazetarët në Bruksel.
Stano thekson se kjo situatë nuk ka ardhur vetvetiu po si pasojë e rrethanave dhe zhvillimeve në vend.
“Kjo situatë nuk ka ardhur vetvetiu, por është pasojë e rrethanave dhe zhvillimeve, për të cilat janë përgjegjëse të dyja palët”, shtoi ai.
I pyetur nëse tensionet në veri nënkuptojnë se dialogu mes Kosovës dhe Serbisë, që ndërmjetësohet nga BE-ja ka dështuar, Stano tha se “jo, dialogu vazhdon. Përpjekjet madje janë shtuar dhe dialogu tani është i rëndësishëm se kurrë”.
Nga përleshjet mes protestuesve serbë dhe ushtarëve të KFOR-it, të hënën në Zveçan, mbetën 35 ushtarë të plagosur, ashtu si edhe më shumë se 50 protestues.
Që nga 26 maji, tensionet në veriun e Kosovës, të banuar me shumicë serbe, janë rritur, pas hyrjes në objektet komunale të kryetarëve të rinj shqiptarë të Zveçanit, Leposaviqit dhe Zubin Potokut./Opinion.al
