Studiuesit tani po e lidhin mungesën e një vitamine të veçantë me funksionin më të keq të mushkërive.
Shpesh, kur ndjeni ankth të fortë, ju sugjerohet të merrni frymë thellë. E njëjta gjë kur jeni në një mjedis natyror, për të mbushur mushkëritë tuaja me oksigjen. Por si do të merrni frymë thellë nëse nuk keni mushkëri të forta? Peizazhet e mëdha urbane, me atmosferën e tyre të ndotur, si dhe zakonet e dëmshme, si pirja e duhanit, dëmtojnë shëndetin e mushkërive tuaja, duke rritur rrezikun e sëmundjeve të mushkërive.
Një studim i ri ka nxjerrë një gjetje të rëndësishme: Ju mund të mbroni shëndetin e mushkërive duke u siguruar që trupi juaj të ketë mjaftueshëm një vitaminë të caktuar. Si? Sigurisht nëpërmjet ushqyerjes së duhur.
Hulumtimi i publikuar në ERJ Open Research sugjeron në mënyrë specifike se ata që nuk marrin sasi të mjaftueshme të vitaminës K, mund të jenë në rrezik të shtuar për shëndetin e dobët të mushkërive. Mungesa e vitaminës është shoqëruar, në veçanti, me kushte të tilla si astma, fishkëllima dhe sëmundja kronike obstruktive pulmonare (COPD).
Deri më tani, dihej se vitamina K, një lëndë ushqyese thelbësore që gjendet kryesisht në perimet me gjethe jeshile, vajrat vegjetale dhe drithërat, është jetike për koagulimin e gjakut, duke ndihmuar në shërimin e plagëve. Roli i saj në shëndetin e mushkërive, megjithatë, mbeti e paqartë deri vonë.
Në hulumtimin e kryesuesve të Shkencave të Universitetit të Kopeghagas, morën pjesë 4.000 pjesëmarrës, të moshës nga 24 – 77 vjeç.
Të gjithë pjesëmarrësit iu nënshtruan spirometrisë, një test që vlerëson funksionin e mushkërive, dhanë mostra gjaku dhe plotësuan pyetësorët, duke dhënë informacion për shëndetin dhe stilin e tyre të jetesës.
Nga testet e gjakut, studiuesit kërkuan një tregues të caktuar (dp-ucMGP), për të gjetur nivelin e vitaminës K në organizëm. Në të njëjtën kohë, përsëriten dy matjet nga spirometria:
Vëllimi i ajrit që njeriu mund të nxjerrë në një sekondë (FEV1) dhe vëllimi maksimal gjatë një frymëmarrjeje (FVC).
Rezultatet e studimit zbuluan një korrelacion midis treguesve të mungesës së vitaminës K dhe vlerave të reduktuara të FEV1 dhe FVC. U zbulua gjithashtu se pjesëmarrësit me nivele të reduktuara të vitaminës K kishin gjithashtu më shumë gjasa të raportonin incidente të sëmundjes pulmonare obstruktive kronike (COPD), astmës ose frymëmarrjes.
“Ne tashmë e dimë se vitamina K luan një rol të rëndësishëm në gjak, dhe kërkimet kanë filluar të tregojnë se ajo është gjithashtu e rëndësishme për shëndetin e zemrës dhe kockave. Studimi ynë tani tregon se vitamina K gjithashtu mund të luajë një rol të rëndësishëm në shëndetin e mushkërive”, tha Dr. Torkil Jespersen. “Në vetvete, gjetjet tona nuk ndryshojnë rekomandimet aktuale për marrjen e vitaminës K, por tregojnë se nevojiten më shumë kërkime për të përcaktuar nëse njerëzit me sëmundje të mushkërive mund të përfitojnë nga plotësimi i vitaminës K”, shtoi ai./Opinion.al
