Detaje të reja kanë dalë në media në lidhje me Masakrën e Peshkëpisë. Raporti i plotë i policisë së Gjirokastrës, i shkruar menjëherë pas ngjarjes është siguruar sot nga Abc News.
Raporti i dërguar Ministrisë së Brenshme, bën një përshkrim me hollësi ngjarjeve të ndodhura 25 vjet më parë. Sipas tij disa nga agresorët që morën pjesë në masakër flisnin shqip. Autoritetet greke në lidhje me këtë ngjarje kishin ndaluar më 18 mars të vitit 1995, 7 të dyshuar. Gjatë kontrollit atyre u ishin gjetur armët e municionet e rrëmbyera në Postën Kufitare të Peshkëpisë. Megjithatë gjykata në Athinë vlerësoi në atë kohë se armët nuk ishin prova të mjaftueshme për të dënuar të ndaluarit kështu që ata u lanë të lirë.
Të ndaluarit e komandës së ashtuquajtur “Pirro i Parë”, ishin:
Jorgos Anastasulis, 34 vjeç, shtetas grek, oficer, Apostolos Karvelas, 26 vjeç, shtetas grek (ish-polic rrugor), Marios Kutula, 25 vjeç, qytetar shqiptar, Fredi Beleri, qytetar shqiptar, 23 vjeç, (i cili përdor disa emra si Dionisios dhe Foti), Jorgo Kristo, 26 vjeç, Jorgo Papa, 30 vjeç, të gjithë këta janë nga Himara, Harallamb Papa, 21 vjeç, nga Krioneri i Gjirokastrës.
Ky raport dhe prova të tjera mesa duket tashmë janë siguruar nga drejtësia shqiptare e cila e kanë marrë në pyetje Belerin tri herë në një hark të shkurtër kohor.
Fredi Beleri dyshohet se ka marrë pjesë në masakrën e Peshkëpisë. Ai u shfaq në Himarë në vitin 2015, si kryetar i Omonia dhe njëkohësisht kandidoi për Kryetar Bashkie por humbi përballë Gjergji Goros së PS.
Beleri serish do të kandidonte për logon e Omonia-s në zgjedhjet e 30 qershorit, por Komisioni Qendror i Zgjedhjeve, ka refuzuar kandidimin e tij si kandidat i pavarur për Bashkinë e Himarës. KQZ ka bërë me dije se gjatë verifikimit, ka konstatuar shkelje në formularin e dekriminalizimit, pasi Fredi Beleri është dënuar me 3 vjet heqje lirie në vitin 2016, për urrejtje nacionaliste dhe nuk ka kryer burg. /Opinion.al
