Qëkur princi Philip bëri aksident me makinë dhe u konstatua se nuk kishte rrip sigurimi janë shtuar shumë zërat rreth sigurisë së anëtarëve të familjes mbretërore dhe mesazhit që ata përcjellin tek populli. Por edhe pse duket paradoksale anëtarët e familjes mbretërore nuk mbajn rrip pikërisht për të qenë më të sigurt, kësisoj, në raste emergjente ata e kanë më të lehtë arratisjen, sepse mungesa e rripit iu mundëson që të lëvizin më shpejt nga makina.
Për “Hello Magazine” oficer i sigurisë së familjes mbretërore, Simon Morgan, ka deklaruar: “E rëndësishme në një situatë të caktuar është mbrojtja e individit. Për shembull, në raste rreziku për të dalë sa më shpejt nga një automjet është e nevojshme mungesa e rripit!”.
Pak ditë më parë duka i Edinburgut, Princi Philip u përfshi në një aksident rrugor. 97-vjeçari nuk u plagos në aksident dhe nuk pësoi asnjë lëndim. Por më shumë se aksidenti vetë, në media dhe rrjete sociale u komentua fakti që ai nuk mbante rrip sigurimi, si një thyerje e qartë e rregullave.
Princi Philip, bashkëshorti i Mbretëreshës, është tërhequr nga jeta publike dhe nga funksionet e tij në Gusht të vitit 2017. Tërheqja e tij erdhi pas dekadave mbështetje ndaj Mbretëreshës në evente bamirësie dhe ceremoni të tjera. Pallati Mbretëror llogariti se që nga viti 1952, Duka i Edinburgut ka kryer 22.219 angazhime publike./E.M
