Shkencëtarët kanë zbuluar një specie të re pterosauri – një zvarranik fluturues që fluturoi mbi dinosaurët më shumë se 200 milionë vjet më parë.
Nofulla e zvarranikut të lashtë u zbulua në Arizona në vitin 2011, por teknikat moderne të skanimit tani kanë zbuluar detaje që tregojnë se i përket një specieje të re për shkencën.
Ekipi i kërkimit, i udhëhequr nga shkencëtarë në Muzeun Kombëtar të Historisë Natyrore Smithsonian në Uashington DC, e ka quajtur krijesën Eotephradactylus mcintireae, që do të thotë “perëndesha e agimit me krahë hiri”.
Është një referencë për hirin vullkanik që ndihmoi në ruajtjen e kockave të saj në një shtrat lumi të lashtë.
Nofulla e pterosaurit me madhësinë e një pulëbardhe u ruajt në një shkëmb 209 milionë vjeçar.
Detajet e zbulimit janë botuar në revistën Proceedings of the National Academy of Sciences.
Vendi i këtij zbulimi është një shtrat fosil në një peizazh shkretinor me shkëmbinj të lashtë në Parkun Kombëtar të Pyllit të Petifikuar.
Më shumë se 200 milionë vjet më parë, ky vend ishte një shtrat lumi, dhe shtresat e sedimenteve gradualisht bllokuan dhe ruajtën kockat, luspat dhe provat e tjera të jetës në atë kohë.
Nofulla e pterosaurit është vetëm një pjesë e një koleksioni fosilesh të gjetura në të njëjtin vend, duke përfshirë kocka, dhëmbë, luspa peshku dhe madje edhe jashtëqitje të fosilizuara (të njohura edhe si koprolite).
Vendndodhja është në Arizona, ku formacionet shkëmbore që janë më shumë se 200 milion vjet të vjetra kanë ruajtur dhe fosilizuar mbetjet e kafshëve.
Me një moshë rreth 209 milionë vjeçare, ky tani besohet të jetë pterosauri më i hershëm që është gjetur në Amerikën e Veriut./Opinion.al
