Baloni kinez që u pikas nga Pentagoni ndërsa fluturonte në vende të ndjeshme raketore balistike amerikane mund të udhëhiqet nga teknologjia e avancuar e inteligjencës artificiale. Kështu është shprehur një ekspert amerikan të premten, raportojnë mediat e huaja.
Një balon i dytë i mbikëqyrjes kineze u pa më vonë mbi Amerikën Latine, tha Pentagoni, pa specifikuar vendndodhjen e saktë të saj.
William Kim, një specialist në balonat e vëzhgimit në institutin e mendimit “Marathon Initiative” në Uashington, i tha AFP se balonat janë një mjet i vlefshëm vëzhgimi që është i vështirë për t’u rrëzuar.
Kim tha se balona e parë kineze dukej si një balonë normale meterologjike, por me karakteristika të dallueshme.
“Ka një ngarkesë mjaft të madhe, të dukshme – elektronikën për udhëzime dhe mbledhjen e informacionit, të mundësuar nga panele të mëdha diellore. Dhe po ashtu duket se ka teknologji të avancuara të drejtimit që ushtria amerikane nuk i ka vënë ende në praktikë në ajër,” shpjegoi eksperti.
Inteligjenca artificiale ka bërë të mundur që një balon, vetëm duke lexuar ndryshimet në ajrin rreth tij, mund të drejtohet atje ku dëshiron që të shkojë, tha Kim.
– Cilat janë avantazhet ndaj satelitëve?
Kim tha se ndërsa satelitët bëhen më të prekshëm ndaj sulmeve nga Toka dhe hapësira, balonat kanë avantazhe të dallueshme. Së pari, ato nuk shfaqen lehtësisht në radarë.
“Këto janë materiale që nuk reflektojnë, nuk janë metal. Pra, edhe pse këto balona zgjerohen në vëllime mjaft të mëdha, zbulimi i balonës është problem më vete.” Dhe ngarkesa, nëse është mjaft e vogël, mund të anashkalohet.
Balonat gjithashtu kanë avantazhin e mbajtjes së pozicioneve relativisht të palëvizshme mbi një objektiv mbikqyrjeje, krahasuar me satelitët që orbitojnë vazhdimisht, të përdorur nga agjencitë e spiunazhit për të bërë fotografi.
“Balonat mund të qëndrojnë lart, ato mund të qëndrojnë më shumë se një muaj, krahasuar me satelitët në orbitën e ulët të Tokës,” tha Kim.
A mund të ketë hyrë aksidentalisht në hapësirën ajrore të SHBA?
Kim e quajti një “mundësi reale” që balona të ketë pasur si mision kryesor të mblidhte të dhëna nga jashtë kufijve të SHBA-së ose shumë më lart, por nuk ka funksionuar.
Eksperti shpjegoi gjithashtu se edhe rrëzimi i balonave nuk është një opsion i lehtë.
“Këto balona përdorin helium. Nuk mund ta qëllosh dhe pastaj të digjet. Nëse i bën vrima, gazi do të rrjedhë shumë ngadalë.”/Opinion.al
