Ana Doko, studente e fakultetit Ekonomik i dha fund jetës në rrethana ende të paqarta. Ajo kishte lënë një letër, -raporton gazeta “Panorama”,- ku i linte amanet prindërit, motrës së saj me të cilën jetonte në Qytetin Studenti. 20 vjeçarja nga Fieri shkruante: “Jam lodhur nga jeta! Mos e kërkoni fajin askund…”,
Në fund i drejtohej motrës së saj më të vogël, së cilës i thoshte: “Amanet mamin dhe babin…!”.
Pasi ka shkruar këtë letër, Ana u ka telefonuar prindërve të saj në Fier, duke u thënë se ndihej keq. I ati dhe e ëma janë nisur me urgjencë drejt Tiranës dhe janë gjendur pranë saj para se të ndërronte jetë.
Madje i ati i ka bërë frymëmarrje artificiale, deri në momentin që autoambulanca e qendrës shëndetësore të Qytetit Studenti e ka dërguar në QSUT-së. Ka akuza ndaj shërbimit të urgjencës e cila u vonua në mbërritjen në konvikt edhe pse ndodhet pak metra larg. Motra e saj ka shkruar në rrjetin social “Facebook” se nëse ambulanca nuk do të vonohej, e reja mund të shpëtonte.
Pak minuta pasi është futur në reanimacion dhe i është nënshtruar terapisë intensive, vajza ka ndërruar jetë.
Për vdekjen e Anës ka reaguar edhe mësuesja e saj, Donika Begaj, e cila thotë se ajo e familja duhen lënë të qetë. “Ana shembullore në mësime dhe në sjellje u largua nga kjo jetë në moshën më të bukur, duke lënë në mes ëndrrën e saj, diplomimin. U prehsh në paqe Ana e bukur, nxënësja ime e dashur”, thotë ajo.
