Gruaja që u vra nga i shoqi në tualetin e mobilerisë, kishte lënë një letër ku rrëfente vuajtjet e së kaluarës.
Letra u bë publike sot në seancën gjyqësore, ku Sadedin Sulës iu caktua masa e sigurisë “arrest me burg”.
“Kam kaluar momente që nuk mendoja se do t’i kaloja. Kam takuar persona që nuk mendoja t’i takoja. Jam e zhgënjyer”. Këto ishin fjalët e fundit në letrën e fundit të së ndjerës Suela Sula.
Letra u zbulua në tualet dhe u paraqit në Gjykatën e Shkodrës nga Prokuroria. Mirëpo, vërtetësia e kësaj letre është mohuar nga i shoqi i të ndjerës. Ai tha se ky shkrim nuk ishte i saj dhe shenjat e gishtave në qafën e saj ishin pasi donte t’ia maste pulsin.
“Letra nuk është shkruar nga ajo. Nuk është kaligrafia e saj. Kur dola në mëngjes më tha jam e mërzitur, kam një shtrëngim në kraharor. Kur shkova në mobileri nuk e gjeta. Hyra në banjo dhe e gjeta të lidhur me litar. Shenjat e gishtave në fyt janë pas i mata pulsin”.
