Policia e Korçës ka një laborator që shërbente për prodhimin e dokumenteve të falsifikuara për të udhëtuar drejt Britanisë së Madhe, ShBA-së, Kanadasë dhe në hapësirën SCHENGEN.
Pas hetimeve, policia ka arrestuar 3 persona të cilët e ushtronin këtë veprimtari kriminale, kundrejt pagesës 300 deri në 10 mijë euro.
Konkretisht në pranga kanë rënë – Th. Sh., 60 vjeç; B. D., 52 vjeç, banues në Korçë dhe A. R., 57 vjeç, banues në Korçë, me precedent të mëparshëm penal në fushën e falsifikimit të dokumenteve.
Policia sekuestroi qindra dokumente të falsifikuara, fotokopje dokumentesh të huaja dhe shqiptare, të dyshuara të falsifikuara, pajisje kompjuterike, makineri prodhimi dhe plastifikimi, vula, simbole, emblema të shteteve të huaja, automjete, shuma parash të siguruara nga ky aktivitet.
“Shërbimet e Policisë gjatë kontrolleve të ushtruara në kuadër të këtij operacioni në banesat e dy shtetasve Th. Sh. dhe B. D., dhe në automjetin e këtij të fundit, gjetën pajisje kompjuterike, makineri plastifikimi, fotokopje dokumentesh të huaja dhe një shumë parash. Në vijim të veprimeve procedurale, gjatë kontrollit të ushtruar në banesën e shtetasit A. R., u zbulua një ambient i përshtatur si laborator për prodhimin e dokumenteve të ndryshme shqiptare dhe të huaja të falsifikuara”,-njofton Policia./Opinion.al
