Është identifikuar 59-vjeçari me origjinë shqiptare që u vra nga fqinji i tij në Itali. Mediat italiane shkruajnë se bëhet fjalë për Gëzim Dodolin, ndërsa autor i ngjarjes së rëndë është Sandro Mugnai, 53 vjeç.
Gëzim Dodoli u qëllua për vdekje me armë nga Mugnai pasi shqiptari tentoi t’i shkatërronte shtëpinë me ekskavator.
Ngjarja ndodhi rreth orës 20:30 të mbrëmjes së djeshme, më 5 janar, në San Polo, një fshat në periferi të Arezzo.
Famulltari i zonës, Don Natale Gabrielli tregon se dy familjet dikur kishin miqësi më njëra-tjetrën: “Kam shkuar disa herë të ha tek të dyja familjet. Fëmijët, sot të rritur, shërbenin në meshë me mua dhe rrinin në famulli. Më pas familja Dodoli u transferua në Milano, por prej disa kohësh, Gëzimi ishte kthyer i vetëm. Se çfarë ndodhi nuk e di, por di që ndoshta Sandro donte të mbronte familjen e tij. Çatia po binte për shkak të goditjeve të ekskavatorit, do të kishin vdekur të gjithë të shtypur”, thotë ai.
Karabinierët arrestuan 53-vjeçarin italian me akuzën e vrasjes. Arma dhe gëzhojat e gjetura në vendin e krimit janë sekuestruar si dhe e gjithë zona iu nënshtruar konstatimeve të departamentit të hetimeve shkencore.
Autoriteti gjyqësor italian ka urdhëruar nisjen e hetimeve ndërsa53-vjeçari i arrestuar është dërguar në burgun e Arezzo-s.
