Policia dhe Prokuroria kanë bërë me dije se po vijojnë hetimet për zbardhjen dhe vënjen para përgjegjësisë së tre grabitësve dhe bashkëpunëtorëve të tyre, që vodhën në aeroportin e Rinasit pothuajse 1 milion euro.
Nga informacionet e deritanshime, grupi hetimor duke parë e riparë pamjet e kamerave të sigurisë dhe duke analizuar të gjitha të dhënat e marra nga hetimi, 2 nga tre grabitësit janë të moshës nga 25 deri në 35 vjeç, me fizik të dobët dhe me gjatësi nga 165 -180cm.
Kurse personi i tretë, është i shkurtër rreth 160 deri 170 cm, me trup të shëndoshë dhe i moshës mbi 35-40 vjeç.
Sipas Policisë, identikiti i tre të dyshuarve është ndërtuar falë kamerave të sigurisë së furgonëve të blindit, të cilët ishin pajisur me kamera sigurie.
Mësohet, se janë përdorur pikërisht këto kamera, pasi konçesionari dhe kompania private ICTS nuk kishte vendosur kamera sigurie në zonën e ngarkimit të dërgesave postare dhe parave në avion.
Policia bëri me dije se para pak ditësh kishte gjetur edhe një paruke, e cila me shumë gjasa është përdorur nga autorët e grabitjes së aeroportit të Rinasit.
Të njëjtat burime, bënë me dije se parukja i përket njërit prej grabitësve.
Ajo është dërguar të analizohet në laboratorin shkencor të Policisë së Shtetit.
