Komisioni i reformës në drejtësi miratoi vetem me votat e mazhorances ligjin per prokurorinë duke mos marrë parasysh edhe një sërë vërjetjesh të opozitës.
Demokratët e prezantuan sot opinionin e tyre dhe një prej vërejtjeve lidhet me peshen që u jepet drejtuesve të prokurorive në rrethe.
PD-ja vlereson se ato kane peshë specifike dhe vendimmarrëse më të madhe dhe kjo paraqet nje potencial të lartë rreziku për të dizintegruar prokurorinë, në “ishuj” të pavarur pushteti.
Përsa i përket kompetencave dhe rolit të kryeprokurorit vleresohet se ai është shndërruar vetëm një funksion që mbledh statistika.
E drejta e kontrollit për korrektësinë e zbatimit të udhëzimeve të tij, nuk i njihet atij, por Inspektorit të Lartë të Drejtësisë (ILD). Ndërkohë, në Kushtetutë, ILD është konfiguruar vetëm si instrumenti për procedimin disiplinor të prokurorëve dhe jo për vlerësimin e performancës.
Nje pike tjeter ku ekspertet e opozites jane ndaluar ne kete projektligj lidhet me kriteret e emërimit të Prokurorit të Përgjithshëm. Sipas PD-se kriteret e integritetit moral dhe profesional kanë nëvojë për përmirësim dhe për saktësim të procedurës së listës së renditjes së kandidatëve.
Ndersa përsa i përket marrëdhënieve me institucionet e tjera opozita vlerëson se në marrëdhëniet me Kuvendin, Prokurori i Pergjithshem përcaktohet si përgjegjës për mënyrën dhe masën e respektimit të udhëzimeve të përgjithshme të dhëna prej tij, ndërkohë që kryeprokurorit nuk i njihet instrumenti i kontrollit ndaj prokurorëve më të ulet lidhur me zbatimin e tyre.
Ky ligj, sipas opozites duhet t’i japë zgjidhje tranzitore edhe situatës së krijuar me organin e prokurorisë, dhe rrezikun për bllokim institucional. /ABCNEWS
