Goditet një rast tjetër i kultivimit të lëndëve narkotike, arrestohet autori i dyshuari kryesor, një tjetër shpallet në kërkim.
Dy sera me kanabis janë zbuluar në Velipojë të Shkodrës gjatë aksionit policor të koduar “Njësia”.
Bëhet me dije nga uniformat blu se janë gjetur në total 2150 fidanë kanabisi, të kultivuar në dy sera të ndryshme të fshatit Luarza dhe fshatit Reç.
Policia ka vënë në pranga shtetasin Fatmir Bajrami 55 vjeç, si dhe shpalli në kërkim vëllain e tij Xhevahir Bajrami 37 vjeç. Të dy janë autorë të dyshuar të kultivimit të fidanëve narkotikë kanabis.
“Në vijim të operacionit, në përfundim të veprimeve të para hetimore, specialistët për Hetimin e Krimeve të Komsiariatit të Policisë Shkodër arrestuan në flagrancë shtetasin F. B., 55 vjeç, si dhe shpallën në kërkim shtetasin Xh. B., 37 vjeç, si autorë të dyshuar të kultivimit të fidanëve narkotikë cannabis sativa.
Operacioni vijon për kapjen e shtetasit Xh. B., identifikimin dhe kapjen e shtetasve të tjerë të implikuar në këtë veprimtari kriminale”, thotë Policia.
Materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme./Opinion.al
