Punonjësi i një pikë skrapi është arrestuar nga policia e Shijakut.
Policia njofton se në pikën ku ai punonte, në Maminas, zbuloi 1 ton gëzhoja predhash të cilat i sekuestroi.
Gëzhojat e predhave ishin shitur në pikën e skrapit nga një punonjës i repartit ushtarak në Shijak.
Ndaj këtij të fundit policia njofton se janë kryer veprimet nga ana e Policisë Ushtarake.
Vlera e gëzhojave të bllokuara është rreth 2 milionë lekë të vjetra, sipas policisë.
Mbetet ende e paqartë përse është arrestuar vetëm punonjësi i pikës së skrapit ndërsa nuk dihet nëse ai ishte edhe pronar i saj. Nga ana tjetër në njoftimin e policisë nuk është e qartë se çfarë masash janë marrë për punonjësin e repartit ushtarak.
Njoftimi i policisë
Specialistët për Hetimin e Krimeve në Komisariatin e Policisë Shijak, gjatë kontrollit të ushtruar në një pikë skrapi në Maminas, gjetën dhe bllokuan 1 ton gëzhoja predhash, me vlerë 2 milion lekë të vjetra.
Në pranga ra shtetasi me inicialet R. Q., 30 vjeç, banues në Qerret, punonjës në pikën e skrapit.
Gjithashtu janë kryer veprimet nga ana e Policisë Ushtarake për shtetasin G. L., 32 vjeç, banues në Paskuqan, Tiranë, me detyrë punonjës në repartin ushtarak, Shijak, i cili i ka shitur shtetasit R. Q., gëzhojat e bllokuara. /Opinion.al
