News24 dhe BalkanWeb kanë siguruar vendimin e Gjykatës së Krimeve të Rënda për të ashtuquajturin “Escobari i Ballkanit”, Klemend Balili, i cili prej ditësh është në kërkim nga policia.
Krimet e Rënda vendosën “arrest me burg” për Balilin më 9 dhjetor ndërsa vendimi është firmosur nga gjyqtarja Iliriana Olldashi. Klemend Balili akuzohet për disa vepra penale, mes tyre ‘Trafikim narkotikësh në bashkëpunim’; ‘Krijim e pjesëmarrje në grup kriminal’; “Kryerje të veprave penale nga organizata kriminale”.
Po kështu News24 e BalkanWeb kanë siguruar edhe regjistrimin e procedimit penal që është bërë më 4 mars të këtij viti.
Ndërkaq sipas kërkesës së prokurorisë së Krimeve të Rënda të paraqitur në Gjykatë, thuhet se shërbimet greke dhe DEA amerikane hetuan për një organizatë kriminale që trafikonte lëndë narkotike.
Në përbërje të organizatës kishte shtetas grekë e shqiptarë. Po kështu thuhet se organizata trafikonte kokainë dhe kanabis sativa dhe se trafikimi bëhej me kamionë në disa vende të Evropës. Sipas organit të akuzës kamionët ishin në pronësi të kompanive me shtetas greke.
