Kryetari i Partisë Demokratike, Lulzim Basha ka nxjerrë udhëzimin për strukturat demokrate, mbi bazën e të cilit do të nisë procesi 8 javor i konsultimit me anëtarësinë për rrugët e modernizimit, ndryshimit dhe ristrukturimit të PD si dhe aksionit të saj politik.
Referuar udhëzimit të siguruar nga “Panorama” theksohet që në krye se “manipulimi i zgjedhjeve të 25 qershorit, përmes blerjes së votës, ndikimit të saj me anë të krimit dhe presionit shtetëror, ka thelluar krizën dhe se e vetmja shpresë për të dalë nga udhëkryqi ku gjendet vendi, është Partia Demokratike, vlerat e morali që ajo mbart”.
Udhëzimi është i plotë përfshin çdo element të një konsulte me bazën e anëtarësisë, por theksi është tek disa momente kyce.
Konkretisht nëpërmjet tij, Basha udhëzon të gjitha degët lokale për faktin se “Partia Demokratike po përgatitet të ndërmarrë një aksion të gjithanshëm politik e legjislativ për ndryshimin e sistemit zgjedhor, për të forcuar funksionimin demokratik të politikës dhe për të ulur mundësitë për ndikimin e padrejtë të zgjedhjeve përmes shitblerjes së votës, kërcënimit dhe dhunimit të vullnetit të votuesit”, – thuhet në dokument.
“Kjo reformë do jetë një kontribut i jashtëzakonshëm, por ajo nuk do të mjaftojë për të garantuar zgjedhje të lira dhe të ndershme, nëse ne nuk angazhohemi në aktivitete konkrete në mbrojtje të votës së lirë. Ne do të hartojmë dhe vëmë në zbatim një strategji të brendshme kundër shitblerjes, vjedhjes dhe ndikimit të votës, e cila duhet të përmbajë një plan konkret veprimesh për të parandaluar dhe shmangur tjetërsimin e votës”, – citohet nga udhëzimi i Bashës shpërndarë degëve lokale të PD.
UDHËZIM
Nr. 24, datë 06.10.2017
PËR NISJEN E PROÇESIT TË KONSULTIMIT DHE ANALIZËS TË STRUKTURAVE ORGANIZATIVE TË PARTISË DEMOKRATIKE
Manipulimi i zgjedhjeve të 25 qershorit ka rënduar krizën politike dhe shoqërore në vend dhe ka dëmtuar rëndë besimin e qytetarëve tek sistemi ynë politik dhe për rrjedhojë, ka ulur besimin e tyre tek e ardhmja në Shqipëri. Asnjë hap për përmirësimin e politikës dhe mirëqeverisjes nuk do të ketë efekt nëse nuk mbaron historia e shëmtuar e manipulimit të zgjedhjeve.
Partia Demokratike po përgatitet të ndërmarrë një aksion të gjithanshëm politik e legjislativ për ndryshimin e sistemit zgjedhor, për të forcuar funksionimin demokratik të politikës dhe për të ulur mundësitë për ndikimin e padrejtë të zgjedhjeve përmes shitblerjes së votës, kërcënimit dhe dhunimit të vullnetit të votuesit. Kjo reformë do jetë një kontribut i jashtëzakonshëm, por ajo nuk do të mjaftojë për të garantuar zgjedhje të lira dhe të ndershme, nëse ne nuk angazhohemi në aktivitete konkrete në mbrojtje të votës së lirë. Ne do të hartojmë dhe vëmë në zbatim një strategji të brendshme kundër shitblerjes, vjedhjes dhe ndikimit të votës, e cila duhet të përmbajë një plan konkret veprimesh për të parandaluar dhe shmangur tjetërsimin e votës. Hartimi i kësaj strategjie kërkon identifikimin e të gjitha dobësive, hapësirave dhe instrumenteve të shfrytëzuara dhe përdorura për të manipuluar dhe ndikuar në mënyrë të padrejtë votën, me qëllim propozimin e ndryshimeve dhe masave të nevojshme organizative, strukturore dhe vepruese të të gjithë strukturave të Partisë Demokratike që merren me procesin zgjedhor. Hartimi i strategjisë dhe planit duhet të bëhet me kontributin në ide dhe mendime të të gjithë anëtarëve, mbështetësve dhe drejtuesve të Partisë Demokratike në të gjitha nivelet.
2
Situata e rëndë politike dhe sociale e vendit pas zgjedhjeve të përgjithshme të qershorit 2017, kërkon ngritjen në shkallën më të lartë të aksionit politik të Partisë Demokratike, të strukturave të saj nga qendra deri në bazë, në bashkëpunim me të gjithë faktorët politike dhe civilë, të cilët kërkojnë ndryshime rrënjësore në Shqipëri, mirëqeverisje, luftë kundër korrupsioni, krimit dhe drogës, zhvillim ekonomik dhe paqe sociale.
Partia Demokratike i konsideron zgjedhjet e fundit si një shans të humbur që jo vetem nuk sollën asnjë risi përsa i përket lehtësimit të krizës ekonomike dhe sociale në vend, por thelluan në përmasa të pandodhura më parë, fenomenet e presionit ndaj votuesit, përfshirjes në proces të krimit të organizuar, shitblerjes së votës dhe transformimit të ndjeshëm të vullnetit të zgjedhësve. Në të njëjten kohë, rezultati zgjedhor 2017 duhet lexuar drejt dhe ndershëm, duke marrë të gjitha masat për korrigjimin e mangësive dhe ngritjen e besimit dhe shpresës tek qytetarët shqiptare.
Në këto kushte, Partia Demokratike është forca e vetme politike që ka moralin dhe vullnetin për t`iu përgjigjur këtyre sfidave.
Për këtë arsye, mbështetur në Nenin 38 të Statutit të Partisë Demokratike dhe në Vendimin e Mbledhjes së Kryesisë së Partisë Demokratike, datë 21 shtator 2017, ku u vendos unanimisht fillimi i procesit të konsultimeve dhe analizës me strukturat dhe anëtarësinë e Partisë Demokratike, dhe me qëllim:
– Nisjen e procesit të konsultimeve dhe analizës me strukturën dhe anëtarësinë e Partisë Demokratike; – Identifikimin e problematikave të brendshme të shfaqura në zgjedhjet e përgjithshme 2017, si dhe të hapave konkretë për t`i korrigjuar ato; – Identifikimin e instrumentave dhe personave përgjegjës të presionit politik, ekonomik, administrativ dhe korruptiv, të blerjes dhe manipulimit të votës, të përdorura gjerësisht nga kundërshtari ynë politik; – Ngritjen në shkallën më të lartë të aksionit politik opozitar si dhe rritjen e besimit dhe të angazhimit qytetar në kauzat opozitare,
3
UDHËZOJ:
- Nisjen e procesit të konsultimit dhe analizës me strukturën e Partisë Demokratike. Ky proces do të zgjasë 8 javë dhe do të konsultojë gjerësisht të gjithë strukturën dhe anëtarësinë e Partisë Demokratike;
- Në çdo Degë të Partisë Demokratike caktohet një Grup Pune përbërja e të cilit komunikohet nga Sekretariati për Organizimin.
- Grupi i punës identifikon, sipas nevojës, edhe persona të tjerë të cilët do ta ndihmojnë atë në plotësimin e kërkesave të këtij Udhëzimi;
- Grupi i Punës në Degë do të mbikqyrë procesin e konsultimit dhe analizës sipas metodologjisë së shtojcës nr 1, deri në hartimin e Raportit përfundimtar;
- Ky Udhëzim hyn në fuqi menjëherë.
Sekretari Përgjithshëm
Arben Ristani
KRYETARI
LULZIM BASHA
4
Shtojca nr 1
Metodologjia
Më poshtë përshkruhen hapat për tu ndërmarrë nga Grupi i Punës, në bashkëpunim të plotë me Kryesinë e Degës:
- Mbledhjet e Kryesive në Degë
- Menjëherë pas daljes së Udhëzimit, nën drejtimin e Kryetarit të Degës dhe mbikqyrjen e Grupit të Punës, çdo Degë organizon mbledhjen e parë të Kryesisë për nisjen e procesit të konsultimit dhe analizës. b. Kryesia e Degës njihet me përbërjen e Grupit të Punës si dhe metodikën e analizës dhe miraton: i. detyrat në zbatim të udhëzimit; ii. kalendarin e punës për çdo grupseksion; iii. grupin e punës për çdo grupseksion;
- Me përfundimin e detyrave të analizës dhe konsultimit në nivel grupseksioni, thirret mbledhja e dytë e Kryesisë së Degës e cila shqyrton raportet me gjetjet dhe konkluzionet e çdo grupi pune në nivel grupseksioni.
- Raporti Përfundimtar
- Grupi i Punës formulon një raport përmbledhës me gjetjet kryesore në terren të analizës mbi funksionimin e partisë, ecurinë e fushatës, rezultatin e zgjedhjeve si dhe me propozimet më racionale dhe më të mbështetura për rrugët dhe masat që do të sigurojnë forcimin e funksionimit dhe të aksionit politik të partisë; b. Struktura e Raportit duhet t`i përmbahet çështjeve të renditura në pikën 3 si më poshtë; c. Pas miratimit, Raporti dorëzohet me shkrim dhe në format elektronik pranë Sekretariatit Organizativ të Partisë Demokratike në Qendër.
- Metodika e Analizës dhe Raportimit
Lista çështjeve dhe problematikave që duhen verifikuar/shqyrtuar gjatë analizës jepet më poshtë. Kjo listë do të mbahet parasysh nga Grupi i Punës gjatë procesit të konsultimit dhe analizës, si dhe gjatë hartimit të Raportit përfundimtar, sipas pikës 2/a/b.
5
- Analiza e rezultatit zgjedhor
– Analizimi i detajuar dhe krahasues i rezultateve të zgjedhjeve duke filluar nga çdo qendër votimi; – Verifikimi i pjesëmarrjes në votim krahasuar me zgjedhjet paraardhëse; – Ndikimi i emigracionit dhe migrimit të brendshëm në pjesëmarrjen në votim; – Vota/votuesit e qëndrueshëm, identifikimi i tyre; – Votat/votuesit që munguan, që nuk dolën në votim. Shkaqet/arsyet. Identifikimi i tyre; – Vota e transferuar në subjekte të tjera – shkaqet; – Vota/votuesit e paangazhuar;
- Niveli i përfshirjes së strukturës dhe anëtarësisë në fushatë
– Efektiviteti i kandidatëve: komunikimi, përfaqësimi, harmonizimi me strukturën, reagimi i votuesve; – Roli/përfshirja e figurave me potencial politik; – Aktivizimi/niveli i përfshirjes dhe kontributit i të zgjedhurve vendor; – Bashkëpunimi me grupe interesi dhe komunitete; – Intensiteti/shtrirja dhe ritmi i aktiviteteve të fushatës; – Administrimi i zgjedhjeve: komisionerët, vëzhguesit, numëruesit, grupet mbështetëse, – Përfshirja dhe roli i organizatave partnere (FRPD/LDG) – Koordinimi me partitë aleate, – përfshirja dhe kontributi i tyre – Çështje të financimit dhe shpenzimeve të aktiviteteve të partisë dhe atyre të fushatës;
III. Instrumentet e manipulimit të vullnetit të votuesve (fushata e kundërshtarit)
– Vlerësim i përafërt i sasisë se parasë së përdorur si dhe origjinës së burimit financiar; – Mënyrat e përdorimit të parave; – Strukturat e angazhuara (kriminale apo jo) si dhe teknikat e blerjes së votës; – Identifikimi i personave përgjegjës dhe i veprimeve të tyre konkrete; – Përdorimi i mjeteve të presionit dhe shantazhit të infrastrukturës së shtetit/administratës në votime;
6
- Propozime për përfshirjen e anëtarësisë aktive dhe mbështetjes politike në proceset para dhe gjatë zgjedhore
– ndryshime dhe përshtatje të organizmit të strukturave të partisë dhe shtrirjes së tyre në territor; – ndryshime dhe përshtatje të mënyrës së zgjedhjes së forumeve drejtuese (kryetar, kryesi, etj.) ; – rritjen e efektivitetit të bërjes së fushatës ; – identifikimin dhe përzgjedhjen e kandidatëve ; – mënyrat e parandalimit/neutralizimit të shitblerjes së votës ; – mënyrat e identifikimit dhe mbajtjes së kontaktit me votuesit ; – mënyrat më të përshtatshme për komunikimin me qytetarët dhe për zgjerimin e mbështetjes elektorale ; – ide dhe forma për fuqizimin e aksionit politik opozitar, me fokus fushatën e ardhshme zgjedhore.
