Ditën e sotme ambasadorja e SHBA, Yuri Kim ka zhvilluar një takim me kryeministrin Edi Rama. Në reagimin e ambasadës së SHBA në Tiranë, thuhet se Kim dhe Rama kanë folur në lidhje me ngjarjet e fundit të ndodhura në Shqipëri.
Në këtë njoftim thuhet se ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE.
Po ashtu, në këtë takim është folur dhe për procesin e Reformës Zgjedhore, e cila në mbledhjen e fundit u bojkotua nga opozita. Në përfundim të reagimit të ambasadës thuhet se së shpejti Kim do të takohet dhe me kreun e Partisë Demokratike, Lulzim Basha.
“Ambasadorja e SHBA Yuri Kim u takua sot me Kryeministrin Rama për të diskutuar mbi ngjarjet e fundit. Ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE. Ata u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore dhe masave të tjera që u janë premtuar qytetarëve të Shqipërisë. Ambasadorja Kim do të takohet edhe me kreun e PD-së Basha së shpejti,”-thuhet në reagimin e ambasadës./ Opinion.al
