“Largoji ‘dhitë’ nga parcelat! Hiq çdo gjë të dyshimtë”. Kjo është SMS që i dërgoi inspektori i policisë pronarit të parcelave me drogë pranë tokave të tij në Ersekë.
Duke përfituar nga puna që bënte, Edin Meko ka sinjalizuar në kohë të afërmit dhe fqinjët që t’u shpëtonin operacioneve antidrogë. Aksioni u zhvillua para një jave ku u zbuluan 17 550 rrënjë drogë në zonën e Ersekës. Më pas doli në dritë fakti se droga mbrohej nga polici Meko.
Sipas burimeve nga grupi hetimor, Meko ka qenë vetë kultivues kanabisi dhe ka përfshirë edhe të afërmit e tij. “Sipas të dhënave oficeri i Policisë së Komisariatit Kolonjë, Edvin Meko, pas kontrollit dhe hetimeve të ndërmarra ndaj tij ka rezultuar të jetë kultivues i drejtpërdrejtë i lëndës narkotike, si edhe bashkëpunëtor me disa kultivues të tjerë në të njëjtën zonë”, shprehet burimi.
Operacioni i befasishëm bëri të mundur që të vërtetohen dhe të sigurohen të gjitha provat lidhur me dyshimet e krijuara nga ana e Prokurorisë për kultivim lënde narkotike ndërsa më tej u identifikuan edhe organizatorët dhe porositësit e lëndës narkotike, mes të cilëve edhe emri i efektivit të policisë.
Personat e implikuar në kultivimin e 17 550 rrënjëve janë: Edvin Meko oficer policie, Krenar Nuredini, Mariglen Nuredini, Jorgo Kristali dhe Gramoz Bejko. Në pranga kanë rënë vetëm Kristali dhe Bejko, ndërsa të tjerë, bashkë me inspektorin janë në kërkim.
