Federata e Futbollit do të shkojë me propozime konkrete në tryezën që do të organizohet të hënën sa i përket të gjitha çështjeve që shqetësojnë futbollin shqiptar. Siç raporton Tv Klan, rikthimi i policisë në stadiume është pika kryesore.
Sipas draftit të përgatitur në Federate që do të përkthehet me ndryshime në ligj, do të konsiderohen vepër penale hyrja në fushën e lojës, hedhja e sendeve dhe organizimi i koreve fyese. Sekretari i Përgjithshëm në Federatën Shqiptare të Futbollit Ilir Shulku përmend disa nga propozimet.
“Personat të cilët prishin një ndeshje futbolli, dhunojnë zyrtarë apo lojtarët kundërshtarë, të kenë dënime drastike dhe kjo punë vetëm me masa të rrepta do të fillojë të përmirësohet”.
Si organizmi që qeveris futbollin në vend, Federata po mendon të mbikëqyrë financuesit e këtij sporti duke propozuar lehtësi fiskale për presidentët dhe sponsorët e klubeve. Në takim pritet që të marrë pjesë ministri i Brendshëm Sandër Lleshaj dhe pjesëtarë të tjerë të agjencive ligjzbatuese./ Opinion.al
