Policia ka dhënë detaje të reja për ngjarjen e ndodhur mbrëmjen e djeshme në Elbasan, ku mbeti i vrarë shtetasi Madrit Ulqinaku.
Bëhet me dije se autori i dyshuar i vrasjes së të riut është vetëm 18-vjeç dhe është shpallur në kërkim nga policia.
Po ashtu uniformat blu bëjnë me dije se një tjetër 18-vjeçar është vënë në pranga, pasi ka rezultuar i përfshirë në konfliktin e çastit, gjatë të cilit mbeti i vrarë Ulqinaku.
Ndërkohë është shpallur në kërkim edhe një 33-vjeçar.
“Nga hetimet e kryera rezulton se shtetasit H. P., 18 vjeç, E. D., 18 vjeç dhe K. S., 33 vjeç, janë konfliktuar fillimisht verbalisht me shtetasin M. U. Më pas, shtetasi H. P. dyshohet se ka qëlluar me armë zjarri pistoletë në drejtim të shtetasit M. U., i cili si pasojë e plagëve të marra, ka humbur jetën në vendngjarje. Falë reagimit në kohë dhe veprimeve të shpejta dhe profesionale të shërbimeve të Komisariatit të Policisë Elbasan dhe të atyre të DVP Elbasan , si dhe falë krehjes së zonës dhe kontrolleve me shërbime të shumta policie, u bë e mundur kapja dhe arrestimi i njërit prej shtetasve të përfshirë në konflikt, shtetasit: -E. D., 18 vjeç, banues në Elbasan, për veprën penale “Prodhimi, mbajtja, blerja apo shitja pa leje e armëve të ftohta”, pasi gjatë kontrollit fizik të ushtruar nga shërbimet e Policisë, iu gjetën dhe sekuestruan në cilësinë e provës materiale, një thikë dhe një dorezë metalike.
Vijon puna intensive nga ana e shërbimeve të Policisë, për kapjen e 2 shtetasve të tjerë të shpallur në kërkim. Grupi hetimor nën drejtimin e Prokurorisë pranë Gjykatës së Rrethit Gjyqësor Elbasan, vijon punën për sqarimin e plotë të rrethanave të ngjarjes”, ka njoftuar policia.
