Policia e Vlorës, ka arritur të identifikojë dy nga autorët e vrasjes së pronarit të anijes, Hyqmet Nexhipi, duke arrestuar një prej tyre dhe duke shpallur në kërkim një tjetër.
Sektori për Hetimin e Krimeve të Rënda Vlorë, në bashkëpunim me Prokurorinë pranë Gjykatës së Shkallës së Parë Vlorë, kanë bërë arrestimin e shtetasit Flobenc Gega, 34 vjeç, lindur në Shkodër, banues në Tiranë, i cili në momentin e ndalimit është kapur me armë zjarri pistoletë tip “Glock”.
Gjithashtu është bërë shpallja në kërkim e shtetasit Deison Nallbani, 30 vjeç, banues në Vlorë.
Sipas policisë, nga kryerja e veprimeve hetimore e proceduriale, Nallbani rezulton të jetë autori i vrasjes së 53-vjeçarit Hyqmet Nexhipi, ngjarje e ndodhur mëngjesin e datës 23.01.2016, në lagjen “Pavarësia”, ku u bë ekzekutimi i tij me armë zjarri “Automatik”, në automjetin tip “Honda” me targa greke IBM3231, duke pësuar kështu vdekjen e menjëhershme.
Arrestimi i shtetasit Flobenc Gega, u bë pasi gjatë hetimeve të kryera, ky shtetas është identifikuar si personi që ka siguruar kushtet dhe mjetet për kryerjen e kësaj vrasjeje.
Nga informacionet që disponohen nga Policia e Shtetit, Flobenc Gega është person me precedent penal, i shpallur në kërkim ndërkombëtar nga autoritetet Gjermane për “Grabitje” dhe “Plagosje”.
Gjithashtu, i dënuar nga autoritetet Belge dhe Italiane për “Pjesëmarrje në organizatat kriminale me aktivitet në fushën e narkotikëve, prostitucionit, vrasjeve dhe për kryerjen e 180 grabitjeve me dhunë dhe armë”.
Mësohet se Deison Nallbani ka përdorur edhe gjeneralitet tjetër dhe njihej ndryshe si Arjan Muçaj.
Policia e Vlorës vazhdon hetimet për dokumentimin e plotë të kësaj ngjarjeje.
