Policia ka zbardhur ngjarjen e ndodhur disa ditë më parë në Unazën e Re, ku një person nën kërcënimin e armës, vodhi një shumë parash në një pikë të këmbimit valutor.
Uniformat blu njoftojnë se kanë identifikuar autorin dhe e kanë shpallur në kërkim atë.
Në një njoftim për mediat, autoritetet thonë se në vijim të veprimeve hetimore, bazuar dhe në provat e grumbulluara dhe informacionet e marra në rrugë operative, është organizuan dhe finalizuan operacionin policor të koduar “Round”.
Në kuadër të këtij operacioni u shpall në kërkim autori i dyshuar i kësaj ngjarje, shtetasi A. (M). T., 39 vjeç, banues në Tiranë, i dënuar më parë për të njëjtën veprimtari kriminale.
Gjithashtu u bë arrestimi i shtetasit E. M., 35 vjeç, banues në Fier.
Gjatë veprimeve hetimore ka rezultuar se shtetasi A. (M). T., më datë 24 qershor në Unazë të Re, është futur në një pikë për transferta parash dhe këmbimi valutor, dhe nën kërcënimin e një arme zjarri pistoletë, ka marrë një shumë parash dhe është larguar me një biçikletë.
Shtetasi E. M., i ka vënë në dispozicion autorit të dyshuar një garazh automjetesh, dhe me veprimet dhe mosveprimet e tij ka penguar zbulimin e së vërtetës.
Gjatë kontrollit të garazhit u gjetën biçikleta dhe veshjet e përdorura nga autori gjatë ngjarjes, si dhe një automjet që rezulton i vjedhur me datë 23 shkurt 2023, në Shijak, Durrës.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
