Ish-deputeti i PS, Arben Ndoka ka pretenduar se është i pafajshëm dje në seancën për masën e sigurisë. Pavarësisht kësaj, Gjykata e Krimeve të Rënda vendosi ta lë në “arrest me burg”. Seanca është zhvilluar me dyer të mbyllura, por burimet zbardhen fjalën e Ndokës në sallën e gjyqit.
Arben Ndoka ka pohuar se ka kërkuar që të marrë një tokë pranë lokalit të djalit të xhaxhait të tij, për ta shfrytëzuar për 10 vjet. Sipas Arben Ndokës, ai ka pyetur njerëzit e tij në institucione sa mundësi kishte për ta shfrytëzuar këtë tokë. “Kam kërkuar të shfrytëzoj një brezare afër lokalit të djalit të xhaxhait tim, për të cilin të gjithë në Lezhë e dinë. Kam kërkuar dhe kam sugjeruar që unë të bëj një kërkesë, në Drejtorinë e Përgjithshme të Mjedisit për përdorim 10 vjeçar për të pasur mundësi për ta shfrytëzuar këtë pjesë toke, një sipërfaqe prej 50- 100 m2. Për këtë kam pyetur njerëzit e mi në institucionet përkatëse, është e lirë apo është e zënë, raporton gazeta “Shqiptarja.com”.
Pas shumë kohësh, Drejtori i Zonave të Mbrojtura insistoi që unë të bëj një kërkesë për këtë tokë”-ka pohuar para gjykatës Arben Ndoka,ish-deputet i PS.
Arben Ndoka ra në prangat e policisë pasditen e të dielës gjatë megaoperacionit të policisë “Volvo 4”. Nga përgjimet telefonike të Prokurorisë, Arben Ndoka rezultonte i përfshirë në një skemë tjetërsimi pronash në zonën e Kunes dhe Rana e Hedhun në Shëngjin. Gjithçka u zbulua nga hetimet e prokurorisë për vëllain e Arben Ndokës, Gjevi Ndoka, si i lidhur me Avdylajt e Shijakut, të cilët akuzohen për trafik droge dhe porositës të heroinës së laboratorit të Hasit.
