Oficerët gjyqësorë kanë marrë në pyetje dy grabitësit e karburanteve të autostradës. Ata kanë pranuar fajësinë dhe kanë deklaruar se ishin kushtet ekonomike ato që i shtynë për të bërë krim. Klajdi Pupa, i dënuar më parë për posedim të lëndëve narkotike, dhe Florian Thana, 19 vjeç, i dënuar më parë për vjedhje janë arrestuar ditën e djeshme nga policia. Ndërsa është shpallur në kërkim dhe po punohet për kapjen e shtetasit B.K., 20 vjeç, gjithashtu i dënuar më parë për vjedhje. Të tre të rinjtë janë nga qyteti i Durrësit dhe dyshohet se kanë kryer disa grabitje në autostradën Tiranë-Durrës.
Në dëshminë e tyre ata thanë: “Ne merrnim makina me qira në mënyrë të rregullt, që të mos pikaseshim dhe identifikoheshim. Pasi përfundonim grabitjen, makinat i kthenim sërish te vendi ku i kishim marrë. Armët dhe maskat i kishim siguruar në rrugë të ndryshme. Kemi kryer disa grabitje, kryesisht karburante, pasi ato ishin të hapura gjatë orëve të natës. Rojet dhe punonjësit i dhunonim psikologjikisht nën kërcënimin e armëve. Ne nuk kishin për qëllim të dhunonim fizikisht apo qëllonim mbi punonjësit, pasi objektivi ynë ishte të merrnim paratë e xhiros ditore dhe të iknim”.
