Fation Xhyliu ish-punonjësi i kompanisë “Rogat Security” është personi kyç që ka çuar në zbulimin e bandës që grabiste paratë e bankave.
Ditën kur janë grabitur 3.2 milionë dollarë nga dy furgonët e kompanisë “Jaguar Security” 9 shkurt 2017 dhe 3 milion euro në dhjetor të 2015-es, Fation Xhyliu ka pasur rolin e vëzhguesit të automjeteve që transportonin paratë. Ai ka qënë në Vorë, duke sinjalizuar anëtarët e tjerë të grupit për vendndodhjen e autoblindave.
Xhyliu ka qendruar në Vorë në një apartament me qira dhe ditën kur është shoqëruar, (të shtunën e 11 Shkurtit), ai është gjetur në banesë me të vëllanë Gentjan Xhyliu.
Pas verifikimeve, është lejuar të dalë nga qelia Gentjan Xhyliu, ndërkohë Fationi është mbajtur i izoluar, me argumentin e verifikimit të tij. Policia gjeti në telefonin e Xhyliut disa sms të dyshimta, mesazhe këto që ai nuk ka qënë në gjendje ti japë përgjigje dhe të bindë policët.
Menjëherë ndaj tij janë ngritur dyshime si ai kishte shërbyer si informator i grabitësve dhe i është komunikuar urdhëri i ndalimit, i lëshuar nga prokurori Ervin Karanxha.
Pas këtij momenti, Fation Xhyliu ka vendosur të bashkëpunojë me Policinë e Tiranës duke treguar me imtësi të gjitha detajet e dy grabitjeve dhe emrat e personave që kishin marë pjesë.
Përpara prokurorëve dhe policëve, Fation Xhyliu, ka treguar se prej disa kohësh kishte qënë pjesë e kompanisë siguruese “Rogat Security”.
Ai ka rëfyer se një ditë para se të grabitej furgoni i kësaj kompanie në zonën e quajtur “Qafë-Kashar”, ai ka pasur dijeni për transportimin nga Tirana në drejtim të Rinasit, të një sasie prej 3.2 milionë euro.
“Gjatë kohës kur shërbejë pranë kësaj kompanie kisha detyrën e shoqëruesit të makinës, që transportoheshin sasitë e lekëve nga banka në bankë dhe nga banka drejt Rinasit. Një ditë para se të ndodhte grabitja, unë kam pasur dijeni për këtë transportim”, ka deklaruar ai para hetuesve.
Ndërsa vijon: “Ndërkohë që kisha njoftuar dhe anëtarët e tjerë që kisha vendosur të bashkëpunoja. Pikërisht një ditë para sulmit, kam gënjyer shefat e mi, duke kërkuar që të mos paraqitesha në punë, duke u justifikuar se kisha një punë time personale dhe më nevojitej dita e pushimit.
Kjo kërkesë është bërë tek eprori, ai më ka miratuar pushimin, duke më zëvendësuar me një koleg tjetër. Ndërkohë në 3 dhjetor të 2015, jemi organizuar me detyra të përcaktuara, për të sulmuar makinën që do transportonte lekët nga banka në drejtim të Rinasit. Unë kam qënë në rolin e vëzguesit duke i dhënë informacion anëtarëve të tjerë, për vendodhjen e makinës etj…”.
Më tej ish-polici ka rëfyer në polici, se një ditë pasi kishin grabitur 3.2 milion euro ai është paraqitur në punë, ku kishte dëgjuar kolegët e tij të eskortës së shoqërimit të parave se si ishin sulmuar në mënyrë të befasishme dhe s’kishin mundur të bënin asnjë lëvizje.
Vetë kompania private ka bërë një hetim për këtë grabitje, ku disa prej kolegëve të tij betoheshin se nuk kishin gisht në këtë ngjarje dhe s’kishin dekonspiruar operacionin e transportimit të thasëve me euro në drejtim të Rinasit. Më tej Fation Xhyliu u ka treguar policëve se kishte braktisur punën, duke dhënë dorëhqjen pasi ka hapur fjalë se kishte gjetur një tjetër punë më të mirë.
Ndërsa disa kolegëve të tjerë u ka pohuar se do largohej jashtë shtetit. Xhyliu ka treguar fakte të dobishme edhe për grabitjen e dytë që ata kanë bërë, i cili ka pohuar se sërisht ka qënë në rolin e vëzhguesit. Dëshmia e tij ka qënë çelësi i identifikimit, lokalizimit dhe më pas arrestimin e anëtarëve të këtij grupi kriminal që grabiste lekët e bankave në vendin e quajtur Qafa e Kasharit.
