Në datën 13 qershor Parlamenti votoi me 100 vota pro rezolutën për fillimin e procedurës për shkarkimin e Presidentit Meta. Nga këto vota, 21 ishin të grupit të deputetëve të rinj të opozitës.
Megjithatë siç raporton “Panorama” ata e kanë votuar këtë rezolutë duke qenë nën presion, pasi ju është thënë se nëse nuk nis procesi për shkarkimin e presidentit, ky i fundit do të shpërndajë parlamentin.
Ky pohim është bërë nga kryetarja e Grupit Parlamentar Demokratik, Rudina Hajdari në mbledhjen e Konferencës së Kryetarëve në datën 3 korrik. Në procesverbalin e kësaj mbledhjeje që u zhvillua me dyer të mbyllura tregohet për një debat mes deputetit Balla dhe deputetes Hajdari.
Në hapje të mbledhjes kryetari i grupit parlamentar të Partisë Socialiste, Taulant Balla ka thënë se Kuvendi duhet të vazhdojë me procedurën për shkarkimin e Metës, pasi ai ka shkelur rëndë kushtetutën. Nga ana tjetër Hajdari ka thënë se kjo është kthyer në një luftë politike tashmë mes mazhorancës dhe presidentit dhe se grupi parlamentar i deputetëve të rinj është gjendur në mes të saj. Ajo ka shtuar më tej se votimi i rezolutës së parë është bërë nën presion duke ju thënë deputetëve të rinj se në rast mosshkarkimi të Metës, kreu i shtetit do të nxjerrë një dekret të ri për shpërndarjen e Parlamentit dhe për rrjedhojë, ata kanë bashkuar votat me socialistët.
Balla ka vazhduar debatin duke ritheksuar se presidenti duhet shkarkuar dhe se nuk ja vlen të diskutohet kërcënimi për shpërndarje parlamenti pasi presidenti nuk mund ta bëjë këtë gjë.
Kryetari i Parlamentit Gramoz Ruçi ka ndërhyrë duke theksuar se Kuvendi duhet të mblidhet në seancë plenare për të shqyrtuar raportin e Komisionit të Ligjeve për ngritjen e komisionit hetimor dhe do të jetë vota në Parlament, e cila do të vendosë nëse do të vijë procedura apo jo. /Opinion.al
