Një ditë pas lajmit për një aksident në aksin Shkodër-Velipojë mësohet se në fakt nuk ishte një aksident por një tentativë për vrasje.
Dy persona, përkatësisht Femih Gjorreta që drejtonte Benz-in me targë AA 304 OT dhe Admir Gjorreta me Audi me targë DP 372 CG i kanë dalë përpara duke i zënë rrugën dhe kanë përplasur 31 vjeçarin F.J. i cili ecte me motorçikletë. 31 vjeçari nga fshati Trush i Shkodrës kishte në motor si pasagjer edhe 19 vjeçarin A.J.
“Si pasojë e përplasjes së motorit nga 2 automjetet, personat që udhëtonin në motor kanë përfunduar në kanal. Më pas, të dy personat që kanë qenë në makinë kanë zbritur dhe me mjete të forta kanë ushtruar dhunë fizike ndaj tyre duke u shkaktuar dëmtime të rënda”, njofton policia.
Aktualisht 2 personat e dëmtuar ndodhen në spitalin Rajonal Shkodër nën kujdesin e mjekëve, jashtë rrezikut për jetën.
Ngjarja dyshohet të ketë ndodhur për shkak të një konflikti të mëparshëm për motive të dobëta.
Policia e Shkodrës thotë se janë vënë në pranga 2 nga autorët e dyshuar të kësaj ngjarje, konkretisht :
* Femih Gjorreta, 23 vjeç, banues në fshatin Trush, Shkodër
* Admir Gjorretaj, 23 vjeç, banues në fshatin Trush, Shkodër
Gjithashtu u shpallën në kërkim dhe po punohet për kapjen e :
* G.Gj. 32 vjeç, banues në fshatin Trush, Shkodër
* E.Gj. 27 vjeç, banues në fshatin Trush, Shkodër
Në cilësinë e provës materiale janë gjetur e sekuestruar :
* dy automjetet e autorëve
* motorri i të dëmtuarve
* një krëhër pistolete model 54 me 8 copë fishekë
* një shkop bejzbollisi
* një pistoletë manover
