Darka e punës mes kryeministrit Edi Rama dhe homologut grek, Kyriakos Mitsotakis, të mbajtur mbrëmjen e djeshme në Athinë ka pasur kryefjalë marrëdhëniet dypalëshe, dhe zhvillimet në Mesdheun Lindor, si dhe perspektivën europiane të Shqipërisë.
Zyra e shtypit të kryeministrit grek ka zbardhur detaje nga takimi, ku thuhet se është diskutuar për bashkëpunimin e dy vendeve brenda NATO-s, dhe për pakicat greke në Shqipëri, të cilat janë cilësuar nga palët si urë miqësie dhe bashkëpunimi mes dy vendeve.
“Diskutim i veçantë u bë për Pakicën Kombëtare Greke në Shqipëri, e cila duhet të jetë një urë miqësie dhe bashkëpunimi midis dy popujve, ndërsa theksi u vu në forcimin e marrëdhënieve dypalëshe ekonomike dhe tregtare. Rama e Mitsotakis shprehën kënaqësinë e tyre për integrimin e përkryer të qetë të qytetarëve shqiptarë që jetojnë në Greqi.
Në fund, ata ranë dakord të punojnë së bashku në mënyrë që të dy vendet të zgjidhin shpejt çështjet e pazgjidhura në të kaluarën në një kontekst dypalësh dhe të lëshojnë potencialin e madh që mund të krijojë marrëdhënia strategjike midis dy vendeve”, thuhet në deklaratën e zyrës së shtypit të qeverisë greke.
Homologët, po ashtu kanë folur për integrimin e shtetasve shqiptarë në Greqi, ndërsa theksi është vënë në forcimin e marrëdhënieve ekonomike dhe tregtare. Ata kanë rënë dakord të punojnë së bashku në mënyrë që të dy vendet të zgjidhin sa më shpejt çështjet e lëna pezull./Opinion.al
