Prokuroria e Kukësit do të kërkojë arrest me burg për 11 prej 23 të arrestuarve për protestën në Rrugën e Kombit. Ndërkohë që për 5 të tjerë do t’i kërkohet gjykatës masa arrest shtëpiak. Ndërsa për 7 të tjerë, dy prokurorët e çështjes do të kërkojnë masën detyrim paraqitje.
Prokuroria thotë në kërkesën për vlerësim të urdhrave të ndalimit, se gjatë kësaj proteste u plagosën 12 efektivë të policisë, ndërkohë që u dëmtuan nga gazi lotsjellës edhe katër protestues.
Për të gjithë ata që kërkohet arresti pretendohet se ka prova që i implikojnë se kanë ushtruar dhunë. Ndërkohë që për shtatë të tjerët kërkohet detyrimi me paraqitje duke ju referuar moshës, shkallës së ulët të rrezikshmërisë përshkruhet më tej si edhe gjendjes shëndetësore të njërit prej tyre.
Protestuesit, sipas Prokurorisë, kishin dorëzuar kërkesë për tubimin e 31 marsit, por policia nuk u kishte kthyer përgjigje, sapo janë grumbulluar sipas qëndrimit të prokurorisë protestuesit kanë filluar sulmin duke goditur me sende të forta e duke djegur edhe pikat ku do të paguheshin taksat për rrugën.
Për shkak se është vendosur që masa të zhvillohet në Kukës, policia ka kërkuar masa shtesë nga Forcat e Ndërhyrjes së Shpejtë.
Kujtojmë se prej të dielës pasdite protestohet përpara drejtorisë së policisë së Tiranës për lirimin e të arrestuarve. Protestës së familjareve dhe qytetareve i është bashkuar edhe opozita. Kjo e fundit ka paralajmeruar se do të jete nesër në Gjykatën e Kukësit dhe do të vijojë të kerkoje lirimin e të gjithë protestuesve.
