Gjykata për Krimet e Rënda dëgjoi dje gjashtë dëshmitarë në procesin gjyqësor në ngarkim të Denis Shtrazës, i akuzuar për rrëmbimin e Gazmend Çollakut në Durrës, më 6 janar 2016.
Një prej tyre, gjatë pyetjes në prokurori, kishte treguar se kishte parë katër persona me xhupa policie të konfliktoheshin me një person në parkingun ku u rrëmbye Çollaku. Tre dëshmitarë të tjerë, ish-punonjës dhe punonjës policie rrëfyen se Ervin Dalipaj, ish-i pandehur në proces si i përfshirë në rrëmbimin e Çollakut, kishte qenë me ta në një lokal në Tiranë, në harkun kohor kur ndodhi ngjarja në Durrës.
Çështja penale ndaj Dalipajt, ish-shef i Krimit Ekonomik në Policinë e Tiranës, u pushua për shkak se ai u ekzekutua në një atentat mafioz pranë Sukthit, më 27 prill 2017. Në Gjykatën për Krimet e Rënda, Denis Shtraza po gjykohet për akuzat e “rrëmbimit ose mbajtjes peng të personit e paraprirë ose e shoqëruar me tortura fizike dhe kur është shkaktuar vdekja e tij”, “prodhimit dhe mbajtjes pa leje të armëve luftarake” dhe “mbajtje pa të drejtë të uniformës”.
“RRËMBIMI”
Në sallën e gjyqit, dëshmitari Ketjon Pelivani tha se nuk mbante mend detaje të imëta nga mbrëmja e 6 janarit 2016, ndonëse kishte qenë pak metra larg vendit ku u rrëmbye Çollaku. “Më 6 janar kam qenë në një lokal në Durrës, në katin e poshtëm të barit ‘P…”. Ai është garazh, por është përshtatur si lokal. Unë isha në tualet kur dëgjova një zhurmë. Ishte një si debat. Dëgjova dhe një krismë. U futa në lokal. Pastaj pashë në lajme se ç’kishte ndodhur. Kur dolën jashtë nuk pamë asgjë”, tha dëshmitari në gjyq.
Prokurori i çështjes, Besnik Muçi, i kërkoi trupit gjykues kundërshtimin e pjesshëm të dëshmisë me deklarimet e dhëna nga dëshmitari në Prokurori gjatë hetimit të çështjes. “Dëgjova zhurmë nga parkingu i lokalit. Kam parë katër veta të veshur me xhupa policie fosforeshentë duke u konfliktuar me një person. U dëgjua dhe një krismë arme.
U tremba dhe u futa në lokal. Kur dolëm jashtë nuk ishte më asnjeri aty”, kishte pohuar në deklarimet e tij dëshmitari Pelivani. Më herët, i pyetur nga avokatët nëse oficeri i Policisë Gjyqësore ia kishte lexuar procesverbalin para se ta firmoste, dëshmitari u përgjigj negativisht. Dëshmitari tjetër, Indrit Tafili, menaxher i lokalit “P…” tha se kishte shkuar në lokal 10 minuta pas ngjarjes. “Stafi më tha që kishte ardhur policia dhe ishte konfliktuar me një klient, që quhej Gazmend Çollaku. Telefonova një shok në polici. Ai më tha që do të pyes dhe të them. Më vonë erdhi policia që bëri veprime. Aty hapëm edhe kamerat e sigurisë dhe pamë pamjet. Çollakun e njihja si klient të lokalit. Nuk di të ketë pasur ndonjë konflikt”, tha dëshmitari.
POLICET
Tre ish-kolegë të Ervin Dalipajt, gjatë kohës kur ai ishte pjesë e organikës së Komisariatit nr.4 në Tiranë, ishin fjalë- pakë në sallën e gjyqit. Ata thanë se nuk mund të kujtonin detaje, për shkak të kohës së gjatë, por theksuan se u qëndronin deklarimeve që kishin dhënë në Prokurori gjatë hetimit të çështjes. Dëshmitari Zijadin Allaraj tha se të ndjerin Ervin Dalipaj e kishte pasur vartës në Komisariatin e Policisë nr.4. “Në një nga ditët e janarit të vitit 2016, nuk mund ta kujtoj dot datën e saktë, kam qenë te një lokal te Tregu Elektrik me Dalipajn. Ka qenë rreth orës 19:30 deri në orën 22:00. Ai ka ardhur me makinën e vet, një ‘Benz ML’. Kishin edhe dy veta të tjerë në tavolinë, dëshmitarët që do të vijnë pas meje”, tha Allaraj. Dëshmitari tjetër, Ervis Guri, tha se kishte qenë në të njëjtin lokal me Dalipajn.
“Në janar 2016 kemi pirë një kafe te një lokal te Tregu Elektrik. Nuk e mbaj mend orën. Shikoni deklarimet që kam dhënë në Prokurori. U qëndroj atyre”, tha ai. Në të njëjtën linjë ishte edhe dëshmitari Marjan Laca. “Më besoni që ka qenë diçka shumë e zakonshme. Ne aty takonim thuajse të njëjtët njerëz çdo natë. Nuk mund të kujtoj detaje. U përmbahem të gjitha deklarimeve që kam thënë para oficerit të Policisë Gjyqësore”, tha dëshmitari Laca./Politiko.al
