Kryeministri Edi Rama ka qenë pasditen e sotme në Berat teksa ka zhvilluar një takim me banorët në kuadër të fushatës elektorale.
Gjatë kohës që kryeministri ishte duke mbajtur fjalën e tij, filloj shiu, teksa vetë Rama është shprehur se kjo është një paralajmërim për breshërin e votave për PS.
“Shiu që ka nisur është paralajmërimi i gjithë breshrit të votave të PS që do të hyjë në të gjitha kutitë e votimit që nga Kuçova deri në Skrapar. Që nga Poliçani deri në Dimal dhe natyrisht këtu në Berat. këtu në Berat ku disa vite më parë ishte vërtetë e lodhshme të vijë, ishe një rrugë plot gropa, një rrugë që nuk çonte drejt qytetit turistik, nuk të çonte në një prej vendeve të krenarisë por dukej sikur nuk të çonte asgjëkund. Kujtesa do t’ju ndihmojë që të sillni para syve se si në anë të asaj rruge ishin të rreshtuara tezgat me fruta, me perime, të mbuluara me fier. Rrugët e Shqipërisë ishin si rrugët e një merkatoje kaotike, rrugët e dëshpërimit dhe të mbijetesës për qindra njerëz që punonin tokën. Sot nuk janë më ato tezga në asnjë rrugë të Shqipërisë. Duhet të mundohesh për të gjetur ndonjë tek-tuk. Ku janë ato prodhime, jo vetëm që nuk janë pakësuar por janë shumëfishuar po shkojnë në pikat e grumbullimit”, deklaroi Rama.
Ndër të tjera gjatë fjalës së tij kryeministri është shprehur se Shqipëria duhet të bëhet një vend më i mirë që Zaho dhe bashkëmoshatarët e tjerë të jenë kenarë për shtëpinë e përbashkët.
Ai tha gjithashtu se dorëzimi nuk është alternativë. “Ka vetëm një alternativë përpara këtyre ndjesive që janë të mirëkuptueshme për shkak të pandemisë, kjo alternativë është të vazhdosh të ngjitesh dhe kur këmbët të thonë ndalo, të ngjitesh dhe kur zemra thotë po plas. Ne mund ta bëjmë Shqipërinë ku vajzat dhe djemtë, Zaho dhe bashkëmoshatarët të ndihen krenarë për kushtet e kësaj shtëpie, e shtëpisë së përbashkët që quhet Shqipëri.
Sot Berati është diçka krejt tjetër. Është një vend ku hapen dyer, javë pas jave, muaj pas muaji dhe shtëpitë e vjetra, të mrekullueshme që janë xhevahire të mbledhura kthehen në bujtina, në forcë ekonomike për ato familje që i kanë, për ato familje që punojnë në ato shtëpi. Kjo na mjafton për të kuptuar se sa shumë dyer akoma kemi për të hapur por ama jemi ne të vetmit që do i hapim.
Do mbështesim çdo djalë, çdo vajzë që do kthehet të hapë derën e shtëpisë së stërgjyshit, të babës, për ta kthyer atë shtëpi në pjesë të rrjetit të turizmit, të agroturizmit”, tha Rama./Opinion.al
