Zgjedhjet e parakohshme parlamentare në Maqedoni duhet të shtyhen ndoshta për në vjeshtë, përderisa nuk plotësohen kushtet për zgjedhje të lira dhe demokratike, deklaroi lideri i LSDM-së, Zoran Zaev në një intervistë për Frans Pres.
Parlamenti u shpërbë muajin e kaluar si pjesë e marrëveshjes për t`i dhënë fund krizës politike, me të cilën ndërmjetësonte BE-ja. Lidhja social demokratike dhe dy parti tjera kyçe refuzuan që të marrin pjesë në zgjedhje, shkruan agjencia e lajmeve.
“E di se zgjedhjet nuk do të mbahen me 5 qershor”, deklaroi Zaev.
Ai u thirr në bisedimet midis përfaqësuesve të bashkësisë ndërkombëtare dhe partive politike.
Zaev, siç thotë në intervistë, pret që të gjitha partitë politike në fillim të javës së ardhshme, konform ligjeve maqedonase, ta ftojnë kryetarin e Parlamentit, Trajko Veljanoski që të caktojë seancë, raporton express.
“Të gjithë e dimë se zgjedhjet do të shtyhen”, deklaroi Zaev pas takimit me ndërmjetësuesin gjerman Johannes Haindl.
Ndërkohë, në një intervistë për të njëjtën agjenci, lideri i VMRO-DPMNE-së dhe ish-kryeministër Nikolla Gruevski këmbënguli se zgjedhjet do të mbahen më 5 qershor, edhe pse partia e tij është e vetmja, krahas dy partive tjera minore, që ka paraqitur lista me kandidatë për deputetë. Gruevski tha se së shpejti pas zgjedhjeve të 5 qershorit, në afat prej 2-3 muajve, do të thirren zgjedhje të reja.
