Zoran Zaev është duke zhvilluar vizitën e parë si kryeminister i Maqedonisë në shtetin fqinj, Kosovë. Ai ka patur një takim me homologun Ramush Haradinaj dhe të dy janë shprehur optimist për vazhdimin e fqinjësisë së mirë.
“Kjo vizitë është e rëndësishme. Ne jemi fqinj dhe na lidh perspektiva euroatlantike”, u shpreh Haradinaj për mediat.
Më tej tha se “kemi shtyrë përpara marrëdhëniet tona si dhe kemi marrë përsipër përmbushjen e disa obligimeve në interes të qytetarëve të të dyja vendeve”.
Zaev është shprehur i lumtur me qëndrimin e tij në Kosovë teksa theksoi se janë nënshkruar 19 marrëveshje dypalëshe dhe 20 të tjera janë në pritje.
“Ne jemi dy shtete që ndajmë aspirata të njëjta sepse e ardhmja jone është në NATO dhe në BE”, tha Zaev.
“Dua të dërgoj mesazh për të gjithë qytetarët për bashkëpunim dhe investime për ekonomi, kulturë etj. Vetëm kështu mund të vazhdohet me rritjen dhe bashkëpunimin e dy shteteve” vijoi kryeministri i Maqedonisë.
Ai gjithashtu bëri të ditur që ka ftuar Haradinajn për vizitë në Maqedoni. Po kështu është rënë dakord për një mbledhje të përbashkët qeverie, Kosovë-Maqedoni, bëri të ditur Klan Kosova.
