Kryetari i Lidhjes Social Demokrate në Maqedoninë e Veriut, Zoran Zaev, kërkon mbajtjen e zgjedhjeve të parakohshme parlamentare më 14 qershor.
Duke prezantuar qëndrimin e koalicionit “Mundemi” të udhëhequr nga LSDM-ja në pushtet, Zaev tha se duhet shfrytëzuar stabilizimi i gjendjes me koronavirusin dhe zgjedhjet të mbahen sa më shpejtë që të jetë e mundur, për të mos lejuar, siç tha ai , shkeljen e Kushtetutës.
Ish-kryeministri maqedonas, Zoran Zaev tha se nëse zgjedhjet lihen për në vjeshtë ato rrezikojnë të mos mbahen për shkak të paralajmërimeve për valën e re të sëmundjes Covid-19, dhe për shkak të kësaj vendi do të mbetej pa institucione të qëndrueshme, por edhe që nuk do të kenë as bazë kushtetuese.
Partitë shqiptarë kanë qëndrime të ndryshme mbi mbajtjen e zgjedhjeve. BDI-ja kërkon mbajtjen e tyre sa më parë që të jetë e mundur ndërsa Aleanca për Shqiptarët, në opozitë, kërkon që zgjedhjet të mbahen pasi të hapen kufijtë në mënyrë që e drejta e votës t’i sigurohet edhe atyre që ndodhen jashtë vendit.
Zgjedhjet ishin parashikuar të mbahen më 12 prill por u shtynë për shkak të pandemisë. Aktualisht vendi drejtohet nga një qeveri teknike në të cilën merr pjesë edhe VMRO DPMNE-ja opozitare./Opinion.al
