Kryeministri i Maqedonisë së Veriut, Zoran Zaev, ka shkuar në Sofje, pas aksidentit të rëndë të ndodhur në këtë qytet, nga ku ka treguar që në mesin e viktimave të aksidentit janë edhe 12 fëmijë nën moshën 18-vjeçare.
Kryeministri maqedonas njoftoi se shumica e udhëtarëve nga autobusi i aksidentuar në autostradën Struma në Bullgari janë nga Maqedonia e Veriut, ndërsa theksoi se në mesin e ushtëtarëve ka qenë një shtetas i Serbisë, qytetar i Preshevës dhe një shtetas i Belgjikës.
Po ashtu, Zaev ka treguar se ka folur me një nga të mbijetuarit e aksidentit dhe ka treguar rrëfimin e tij.
“Kam mundur të flas me njërin prej të mbijetuarve. Ai i ka thënë se është dëgjuar një shpërthim i fortë, pas së cilës ai dhe 7 pasagjerë të tjerë kanë arritur të ikin nga dritaret”, tha Zaev, i cili së bashku me ministrin e Shëndetësisë Venko Filipçe dhe Ministrin e Punëve të Jashtme Bujar Osmani tashmë janë në Sofje.
Zaev shton se kanë besim te autoritetet bullgare dhe se nuk do të kërkojë hetim paralel.
“Ne u besojmë kolegëve tanë bullgarë. Nëse ata kanë nevojë për ndihmë, ne jemi të gatshëm t’i ndihmojmë në hetim. Tani gjëja më e rëndësishme është të shohim se si t’i ndihmojmë viktimat,” shtoi Zaev.
Pas njohjes me gjendjen e të lënduarve, kryeministri do të takohet me homologun e tij bullgar Stefan Janev.
