Ambasadorja e SHBA-ve në Shqipëri, Yuri Kim ka shpërndarë në rrjetet sociale mesazhin e sekretarit amerikan të shtetit Antony Blinken.
Në mesazhin e drejtuesit të politikës së jashtme amerikane, shkruhet se shtetet duke bashkëpunuar me SHBA do të ndalojnë personat e korruptuar që ende nuk janë ndëshkuar.
“Duke punuar së bashku, ne do të ndalojmë aktorët e korruptuar të veprojnë pa u ndëshkuar. Departamenti i Shtetit rikonfirmon angazhimin tonë për të gjithë ata që punojnë për të ndërtuar transparencë dhe llogaridhënie në mbarë botën. Urime Kampionëve tanë Antikorrupsion 2021. Liria e medias luan një rol të domosdoshëm në informimin e publikut, për t’i mbajtur qeveritë përgjegjëse dhe për të treguar histori që përndryshe nuk do të tregoheshin. SHBA do të vazhdojë të mbrojë punën e guximshme dhe të nevojshme të gazetarëve në mbarë botën”- thekson sekretari amerikan i shtetit në mesazhin e rishpërndarë nga ambasadorja amerikane në Tiranë Yuri Kim.
