Policia njoftoi mëngjesin e së dielës zbardhjen e rrethanave të vrasjes së efektivit të policisë Xhulio Prela, mëngjesin e 5 Dhjetorit. Zyrtarisht u bë me dije se vrasja ka ndodhur pas një konflikti për arsye banale, ndërkohë që burime bëjnë me dije se gjithçka ka nisur për shkak të dritave të gjata të makinës së njërit prej mjeteve, që duket se kanë penguar drejtuesin e mjetit tjetër.
Mësohet se autorët kanë qenë të veshur me rroba ushtarake dhe ktheheshin nga gjuetia. Ata kanë mbërritur pranë karburantit ku ndodhi ngjarja, 3 minuta përpara se aty të mbërrinte edhe Xhulio Prela. Kanë qenë pikërisht kamerat e karburantit që kanë bërë të mundur identifikimin e tyre.
Xhulio Prela po kthehej nga Shkodra, nga ku kishte dërguar më herët një mikun e tij që ishte kthyer nga Anglia. Vrasja ndodhi në afërsi të fshatit Gajush në orën 03:00 të mëngjesit.
Policia njoftoi sot arrestimin e Nikoll Sherrnikut, 21-vjeçarit që dyshohet si një nga autorët e kësaj ngjarjeje, ndërkohë që është shpallur në kërkim ndërkombëtar bashkëpunëtori i tij me iniciale B.M./Opinion.al
