Qeveria shqiptare brenda këtij muaji duhet të dorëzojë pranë Këshillit të Europës 3 emra, si kandidatë për gjyqtarë ndërkombëtarë në Gjykatën e të Drejtave të Njeriut në Strasburg. I gjithë procesi po zhvillohet pranë zyrës së Sekretarit të Përgjithshëm të Kryeministrit, ku është ngritur edhe një konkurs për këtë çështje.
Opinion.al ka informuar edhe më herët se në mbledhjen e Qeverisë ka patur debate lidhur me mënyrën se si po zhvillohet procesi. Ka patur edhe propozime që gjyqtarët ti nënshtrohen Vettingut, pasi vetë politika shqiptare ka shprehur mosbesim ndaj gjyqtarëve dhe prokurorëve shqiptarë brenda vendit e jo më për ata që na përfaqësojnë jashtë. Lexo këtu:Zbardhet debati në mbledhjen e Qeverisë. Rama s’pranon vetting për gjyqtarët e Strasburgut
Pas publikimit të lajmit, burime nga Këshilli i Ministrave sqaruan se procesi është transparent. Sipas tyre, është futur si kriter integriteti i figurës dhe vettingu. Lexo më shumë: Qeveria shqiptare sqaron pozicionin e saj për kandidaturat e Gjykatës së Strasburgut
Ndërkaq, burime konfidenciale për Opinion.al, thanë se po lakohet emri i kryetarit të Gjykatës së Lartë, Xhezair Zaganjori, për gjyqtar në Strasburg. Duket se me ndryshimet kushtetuese në vend, posti i Zaganjorit në krye të Gjykatës së Lartë është i rrezikuar. Për këtë arsye po përgatitet largimi i tij jashtë vendit, me një detyrë jo të vogël.
Kujtojmë se Zaganjori në vitin 2012 u lakua si kandidaturë për President i propozuar nga të djathtët (në atë kohë në pushtet). Ndërsa në vitin 2013 ai u zgjodh Kryetar i Gjykatës së Lartë. Zaganjori është gjithashtu anëtar i Këshillit të Lartë të Drejtësisë.
/Opinion.al
