Nga debate të forta është përfshirë studio e Opinion në lidhje me projektligjin për barazinë gjinore. Një nga kundërshtuesit e këtij projektligji është Akil Pano, i cili thotë se dëmton familjen tradicionale.
“Është një tmerr i paparë, sepse është një koktejl gjinish. Nuk është fjala për gjinitë binare, sikundër tradita, feja, shoqëritë njerëzore na mëson, është e ndërtuar martesa, familja. Këtu kemi të bëjmë me një shumësi gjinish, aq sa zotërinjtë që kemi në studio me shumë nderim dhe respekt nuk dinë të na japin një numër të saktë”, tha ai.
Nga ana tjetër, aktivistja Xheni Karaj, u shpreh se komuniteti LGBT+ e njeh binarin mashkull-femër, por ekzistojnë edhe transgjinorët, gjinia e të cilëve nuk lidhet me seksin biologjik.
“Ne njohim gjininë mashkull femër. Kjo është e padiskutueshme. Ama, ka një realitet në Shqipëri, që janë personat transgjinorë. Janë realitet që jetojnë në shoqërinë tonë. Janë persona, gjinia e të cilëve nuk lidhet me seksin biologjik”, tha ajo.
Më tej, Karaj u shpreh se transgjinorët duhet të kenë mbrojtje ligjore.
“Ajo se çfarë kërkojmë ne përmes këtij ligji, është pikërisht këto persona që nuk i përkasin binarit gjinor mashkull-femër, e janë persona transgjinorë, të gëzojnë një mbrojtje ligjore”, tha ajo.
