Është zhvilluar mëngjesin e sotëm, seanca dëgjimore nga KPK-ja për anëtarin e Gjykatës së Lartë të Tiranës, Admir Thanza. Ka rezultuar se Thanza ka qenë i dënuar për vjedhje në 1999 në Itali. Gjithashtu, sipas KPK-së, Thanza ka bërë një deklarim të rremë të pasurisë, dhe nuk ka burime financiare të mjaftueshme për të justifikuar pasurinë.
Gjyqtari Admir Thanza ka thënë se e ka kryer dënimin, por nuk e ka bërë ai vjedhjen, por kunata e tij, ndërsa e ka marrë përsipër për shkak të rrethanave familjare.
“Pranova dënimin për hir të nipit tim (djali i vellait). Mbrojta gjakun tim, një të mitur. Nuk kuptova gjë, më thanë që do të ishte një gjobë. Fjala ime e fundit para gjyqtarit italian ishte ‘falenderoj gjykatën’. Kur doli ligji i dekriminalizimit shkova në Itali, mora një çertifikatë dhe më thanë që nuk ka asnjë problem me ty. Nipi im ishte 9-vjeçar dhe ju se imagjinoni që e bëra falë humanizmit. Nipi u kurua në Itali. Nëse kunata ime që kishte kryer vepren penale do të ndalohej, ai rrezikonte te kthehej në Shqiperi. Nipi më thoshte ‘xhaxha të lutem më shpëto, a do të jetoj?’. Mora dënimin jo për të shpëtuar nënën e tij, por për të shpëtuar jetën e 9-vjeçarit. Zoti i madh, mjekësia italiane, dhe ai fëmijë sot është 28 vjeç, është jurist dhe ka një vajzë. Mos më paragjykoni, më gjykoni njëlloj para Zotit, para ligjit”, deklaroi gjyqtari që nuk i mbajti lotët para komisionit të vetingut.
Vendimi për gjyqatrin Thanza do të shpallet në 17 korrik, në orën 10:00. Ndërkohë pritet që ai të shkarkohet nga detyra, si pasojë e mosjustifikimit të pasurisë dhe dënimit në Itali.
/Opinion.al
