Granit Xhaka do t’i mbushë 24 vjeç nesër, por prindërit dhe miqtë e tij kanë udhëtuar në Londër për një arsye tjetër. Ata janë në kryeqytetin britanik për të parë ndeshjen e Ligës së Kampionëve, që do të luhet ndërmjet Arsenalit dhe Bazelit, të mërkurën. Vëllai i tij i madh dhe shoku më i mirë, Taulanti, nuk do të jetë në Londër për të festuar këtë ditëlindje dhe ka mundësi që dy vëllezërit të mos e telefonojnë njëri-tjetrin ditën e nesërme, për shkak se Taulanti dhe Graniti do të jenë të ndarë në dy tabore, para takimit të rëndësishëm të Ligës së Kampionëve për klubet e tyre.
“Ne luanim futboll së bashku, pas shkollës, me shokët tanë, derisa errësohej. Graniti ishte sulmues në moshë të re; ai shënonte shumë gola. Unë luaj në një rol më difensiv se i Granitit dhe mund të mësoj nga ai, sidomos në pasimet nga distanca të largëta, çka është një specialitet i tij”, – thotë Taulanti në një intervistë me gazetën britanike, “The Telegraph”. Taulanti më tej rrëfen përballjen ndaj vëllait të tij të vogël në finalet e Kampionatit Europian, që u zhvillua në Francë, këtë vit. “Isha paksa i frikësuar, sepse nuk doja ta lëndoja atë. Mirëpo, pasi nis loja, ju vetëm qetësoheni dhe përqendroheni te ndeshja”, – rrëfen mesfushori i Bazelit.
Prindërit e tyre, Elmazja dhe Ragipi, mbërritën në Londër të dielën. Taulanti thotë se ata e përkrahin Bazelin me zemër, por do të lumturoheshin edhe nëse Arsenali i Granitit do të mbizotërojë në lojë. Ragipi dhe Elmaze kanë jetuar më parë në Prishtinë, në një kohë kur tensionet etnike midis serbëve dhe shqiptarëve në Jugosllavinë e viteve 90’ po bëheshin gjithnjë e më serioze. Ragipi kishte kaluar tri vite e gjysmë në burg, pasi herë pas here kishte marrë pjesë në demonstratat kundër regjimit komunist të kohës. Kur ai u lëshua nga burgu, u nis me familjen e tij me një autobus dhe udhëtuan përmes Kroacisë, Sllovenisë dhe Italisë veriore, përpara se të vendoseshin në Bazel, ku kanë lindur Taulanti dhe Graniti.
Taulanti thotë se i ka munguar prezenca e vëllait të tij, që prej se u transferua tek Arsenali: “Ne flasim shpeshherë në telefon, por një ditë përpara ndeshjeve nganjëherë ndoshta jo, sepse duhet të përqendrohemi te skuadrat tona.” Taluanti shpreson që ta takojë vëllanë e tij pas ndeshjes, duke thënë se një fitore e Bazelit do ta bënte më të lehtë një gjë të tillë. “Pas ndeshjes shpresoj që të takohemi me Granitin. Më duhet ta pyes trajnerin, por me shpresë se do ta fitojmë ndeshjen, edhe ai do të jetë në disponim të mirë”, – shprehet Taulanti. I pyetur nga “The Telegraph” rreth situatës aktuale të Granitit tek Arsenali, Taulant Xhaka shprehet i sigurt se vëllai i tij do të fitojë besimin e trajnerit francez të Arsenalit, Arsene Wenger, pavarësisht konkurrencës së madhe në skuadrën e “topçinjve”.
